航班例遲無王管 航空樞紐徒虛名

內地航空公司最大特色就係例遲，航班延誤見怪不怪，準時反而唔正常。點知有本港航空公司竟然同內地睇齊，延誤當成家常便飯，甚至可能青出於藍而勝於藍添。

呢，香港航空及其姊妹公司香港快運經常延誤，失驚無神就整一劑，淨係過去兩日咋，至少有十六班機大延誤。其中前日飛北京班機遲咗十三個鐘頭，另一班飛日本沖繩足足遲咗廿三粒鐘，搞到乘客無名火起，齊齊鼓譟表達不滿，有人仲報埋警添。有位乘客等等吓心臟病發，好彩治療後冇大礙咋，否則唔知點收科。

其實，咁嘅場面已經熟口熟面咯。就本月中啫嘛，港航一日之內有五班機延誤，其中兩班遲咗五粒鐘。咁仲係小兒科咋，二月底一班客機遲咗足足十六個鐘，問你服未。睇嚟港航不如改名「例遲航空」算咯，叮！

除咗奉旨延誤，港航仲周不時爆出醜聞。呢，前排有員工投訴被公司要求兼顧埋洗廁所等工作，空中小姐變咗清潔阿姐。更得人驚嘅係，港航近年財困消息不斷，早排被揭發拖欠維修費及清潔費，前幾日又傳出欠機管局泊位費。

雖然港航否認財政有問題，但無論點都好，咁嘅服務水準，邊個乘客仲有信心吖。話時話，咁嘅服務水準除咗影響乘客信心，更加令香港丟架，令航空樞紐蒙污。

港航多年來負面新聞不斷，服務質素每況愈下，奇就奇在當局一直闊佬懶理，冇監冇管。當記者查問港航嘅服務表現時，民航處居然話航空公司嘅服務表現唔係佢哋嘅監察範圍喎。

講到監管航空業，港府直頭交晒白卷。本報曾經踢爆，民航處從未主動定期公布本地航空公司須強制性呈報嘅事故資料等，乘客對航空公司服務質素、安全水平根本無從判斷，隨時可能爆大鑊。呢，當年甘泉航空清盤收場，數以萬計乘客受影響，搞到滿城風雨，如果再有航空公司出事，香港航空業聲譽實一鋪清袋。

飛行安全唔管，服務質素懶理，港府翹埋雙手乜都唔做，太一叮想問一聲，係咪要搞到好似內地咁，乘客衝入跑道攔截飛機，你班官老爺至肯做嘢？叮！