東江染毒敲警鐘 大愚治水莫放鬆

七一回歸，一國兩制，北大人成日話井水不犯河水，其實今時今日井水河水邊有咁易分吖。

好似東江水咁，就係香港嘅主要水源嘞，由於近年污染嚴重，香港人飲落肚嘅隨時係污水、臭水，根本無法獨善其身。呢嗱，東江水又出事嘞，今次仲唔止變臭水，直頭變咗有毒嘅禍水，叮！

一輛載有二十九噸半液態苯酚嘅貨車喺廣東省梅河高速公路失事翻側，當中九噸半苯酚洩漏，部分經小溪流入東江，引發生態災難。本報記者到達現場直擊，東江流域有大量魚類死亡，小溪仲被染成深紅色，呢鋪真正係紅顏禍水咯。

呢舖大劑，有毒東江水不排除流入東莞太園抽水站後再輸入本港，而河道一帶又有供港菜場、魚場，亦可能被污染。醫學界人士指出，苯酚係有毒化學物，會令人急性中毒，嚴重會引致血癌，甚至致命，唔講得笑o架。

禍不單行，東江水呢條錦繡江河已經變咗骯髒臭河，家陣仲面對生態危機，叫人情何以堪。話時話，就算今次災難好彩得到控制，都唔代表東江水從此變番一道清泉，因為長年累月嘅污染臭水可能比苯酚仲毒！

都話飲水思源，香港人如果飲水思源，真係嚇死你。位處江西省嘅源頭河流垃圾遍布，不堪入目，作為東江水供港前最後一站嘅深圳水庫又化身污水收集站。流入水庫嘅河涌不但遍布垃圾，更加隨處可見糞便、死老鼠、用過嘅避孕套等等惡心物品，講起都令人作嘔。

「痛心特首」曾蔭權貪腐枉法，話就話一件污、兩件穢、三件無所謂啫，東江水關乎港人健康，居然處處臭水，度度污染，萬一飲到香港人個個五顏六色，呢隻鑊中港官僚邊個孭得起呀？

話時話吖，東江水變臭污水，唔係一朝一夕嘅事，港產官僚一直置若罔聞，簡直就係嚴重失職啦。最搞笑嘅係，東江水質每下愈況，反而年年加價，港府貼錢買臭水，簡直係大愚治水，懵到上心口。

百姓飲水無小事，中港治水官僚快快保護東江水啦，香港回歸十五年，梁振英新政府上台咪話撥亂反正嘅，唔該快快趣趣向廣東省施壓，讓港人飲上放心水。