「中國人」Chino愛香港夠熱鬧

盧比度與中國頗有淵源，他的花名Chino，在西班牙文即是中國人的意思。自去年千里迢迢來港，親身接觸過中國文化後，便深深被這個有五千年歷史的中華民族吸引，尤其是認識了現時的女朋友後，更有意長期留港發展。

雖然自小在西班牙已被視為「外國人」，然而Chino不但沒感不快，更欣然接受：「細個時朋友話我對眼生得似中國人，所以就有咁嘅花名，但亦因為呢個名之後好多人認識到我，所以我好鍾意人哋咁叫我。」

提起女友腼腆怕醜

Chino現已懂得說一些簡單的廣東話，例如拜拜、多謝、你好、甚至珍珠奶茶等，最近也學懂利用翻譯軟件，用中文去回覆facebook留言，「之前我只從電影知道一啲關於香港嘅嘢，雖然呢度一街都係人，天氣又熱，但我好鍾意呢啲熱鬧嘅生活；反而西班牙一到下午啲人就瞓晏覺，舖頭又閂晒門，成條街冷清清咁，好悶。」眾多傳統節日中，他最愛又是哪一個呢？「新年！唔係因為有利是，我好鍾意見到好多人出街玩，而且大家都好開心。」

有傳媒捉錯用神，誤傳Chino與球會公關Jessica鬧緋聞，其實他早已心有所屬。不過Chino堂堂大男人，談起女友起來一臉腼腆：「我初初嚟香港時，有朋友已經介紹佢畀我識，我哋相處得好好……」他更愈說愈細聲，小記也不好意思再追問下去了。