高海寧示愛被誤認Do姐

出爐港男冠軍李晉強憑迷人矇豬電眼、陽光傻笑加半鹹淡廣東話贏盡評判垂青，連新一代咪神高海寧亦開到聲嗒他糖，但男方坦言對咪神聞所未聞，更一度以為Do姐鄭裕玲向他示愛，被請食檸檬的咪神今次認真瘀！

前晚舉行的《2011香港先生選舉》吸引大批圈中靚女捧場奉旨(目及)仔，勇奪「最佳台型大獎」及「香港先生」的「o靚版池珍熙」李晉強大熱勝出，女粉絲人數一晚激增，連新一代咪神高海寧亦對他虎視眈眈！

穿低胸連身裙、谷三吋事業線的高海寧，昨日出席《荃灣廣場「忍青」祭》活動，今年24歲的她發表「恨嫁宣言」，揚言想30歲前結婚生仔，眼見同屆港姐陳倩揚已為人母更相當羨慕：「一直都想一結婚就生仔，生三個。」提到新一屆港男誕生，她衝口而出直認好冧出爐冠軍李晉強，更讚到對方天上有、地下無：「我一早已經好鍾意佢！好鍾意佢笑容好陽光、好甜！其實佢企喺度乜都唔做，對住我傻笑，已經好好o架喇！」

神女有心．願做「望夫石」

當記者起哄叫現時單身的她找李晉強做男友時，她表面縮沙，卻不自覺流露已充分掌握「獵物」行蹤的舉動：「我哋見過一次面咋！不過佢外形OK，性格唔知係點？又唔知有冇女朋友，佢要返加拿大呀，等佢返嚟先啦！」

本報昨日透過電話訪問，代高海寧向李晉強傳達愛意，不料李晉強劈頭第一句便說：「佢係邊個？唔知喎！係咪DoDo（鄭裕玲）？」經過記者解釋一番後，他高招地婉拒咪神愛意：「希望佢快啲搵到男朋友啦！」

襄王無夢．已經有對象

如此拒愛，問到是否已有女朋友，李晉強直認有對象：「其實係有一個鍾意嘅人，不過未開始。」問到何時才向心儀對象示愛，他即只懂尷尬傻笑，其後表示不介意與高海寧做朋友：「我都想喺呢行發展，識多個朋友都好。（佢好冧你喎？）其實唔係，大家未傾過偈，佢未真正認識我！」李晉強透露會返溫哥華完成Marketing課程後，才到無綫發展。而成名前，他曾拍攝快餐店咖啡廣告，在廣告中繼續展現殺死人傻笑！