on.cc 東方互動主頁

盧比度習武鍊費托

上季聯賽冠軍傑志月底挑戰英超勁旅車路士，西班牙射手盧比度（Chino）會再遇同胞費蘭度托利斯。Chino以往在西甲賽場，與「費托」碰頭輸多贏少，今次背負應屆香港足球先生之名，實在不能再失威。熱愛中國功夫的他更特別向「南拳王」鄭家豪拜師學藝，希望學得一招半式殺退強敵。

為備戰巴克萊亞洲錦標賽，傑志早在本月初開操備戰。34歲的Chino經過連日來在酷熱天氣下練習，已成功將抖暑期間屯積的贅肉消除，但一想到要跟擁有「費托」的車路士決戰，一定要花點心思。向來傾慕東方文化的他，原來也十分嚮往中國功夫。這天經《太陽體育》鋪橋搭路，成功邀得已退役的前世界武術冠軍鄭家豪出山，為Chino上了一課武術速成班，「升呢」迎戰車路士。

熱愛功夫打甩細佬門牙

正式上堂前，Chino先要穿上家豪師傅為他準備的武打衣服。從未穿過唐裝衫的他連扣鈕及束腰帶也有困難，要其他人幫助才能換裝。雖然紅色是死敵南華的顏色，但Chino十分滿意這套新戰衣，更即時將地上的大刀拿上手把玩一番。

「咪住！要學基本嘢先！」家豪師傅一開口，Chino立即乖乖就範：「This is 拳，this is 掌……」Chino悟性甚佳，一學便上手，他得意地說：「我細細個已經係港產功夫片嘅fans，不過由於投入足球事業所以冇時間學功夫，係平時同細佬打交先切磋吓，仲試過打甩佢隻門牙添！」盧比度去季來港時，在航班上看到《葉問》，再次喚醒了潛伏的武術細胞，「我好鍾意呢套戲，雖然唔知佢噏乜，但前後睇咗3次以上！」他還扮葉問在小記胸前揮了幾拳，無師自通也學得似模似樣。

纓槍當Cue棍誤扑師傅

教授了簡單的拳腳功夫後，家豪便拿出刀、槍、劍、棍等兵器，Chino立即雙眼發光，惟他坦言最想學的是雙節棍：「我睇過李小龍電影，佢嘅雙節棍耍得好有型啊！」雖然現場沒有雙節棍，Chino還是十分投入，更搞笑地拿起纓槍當Cue棍，在地上扮「篤波」，逗得師傅開懷大笑；誰知其後擺起姿勢拍照時一舞棍花，卻不慎打中家豪前額，又惹來一陣笑聲……這課速成班亦在開心氣氛下結束。

學完升呢話贏車仔3:0

Chino非常感激師傅指導，更揚言「升呢」後功力大增：「我依家邊隊都唔怕！對車路士都大勝3:0！」他眉飛色舞地說：「我好享受呢次訪問，令我真正知道功夫係咩嘢一回事。（將來會唔會學？）或者啦！如果師傅唔嫌我老，我都想再學吓嘢！」平日也有跟朋友踢波的家豪，也回應說要向Chino偷師。為報答師傅，Chino即場送出兩張對車路士的波飛，家豪揚言必定捧場：「多謝啊！我想買飛好耐，到時一定嚟捧徒弟場！」