政情：搞搞政：鮎魚讀錯音議員出醜

強颱風鮎魚同香港拜拜咗成個禮拜，最終都係打唔成風，對市民冇乜影響，但勢估唔到原來啲風吹咗入立法會議事廳，吹到啲議員亂晒龍。

話說立法會尋日繼續辯論施政報告，會計界議員「波波」陳茂波發言時就提起「鮎魚」早前過門而不入，可惜佢見邊讀邊，將個鮎字讀咗做「占」字，聽到大家呆晒。其後富貴黨議員方剛就仲離譜，連邊都唔睇，九唔搭八地將鮎魚讀成「鯉魚」。點解會變咗鯉魚？究竟方剛當時係咪太掛住禮賓府入面嘅錦鯉呢？

經過傳媒過去一個禮拜鋪天蓋地嘅報道下，大家理應識讀「鮎魚」個「鮎」字，仲會入晒腦o架啦！點解呢兩個議員仲係讀錯個「鮎」字，將呢個強颱風變成其他魚類？真係要問佢哋至知嘞！

嶺南大學中文系助理教授陳雲同我哋講，「鮎」嘅讀音係「黏」嘅第四聲「nim4」，寫唔到出嚟，所以好多人會讀錯咗做「廉」甚至「占」。台灣方面為咗減少混淆，索性將「鮎」字改做「鯰」，讀音都係一樣。