政情：經濟動力暫無意組黨
經濟動力嘅立法會議員Jeffrey林健鋒尋日就話同舊黨友再見亦是朋友，即使派人出戰區選，亦未必會追住黨友嚟打，同舊黨友方剛、張宇人同周梁淑怡等仲有偈傾，仲話經濟動力暫時無意轉為政黨。
Jeffrey話經濟動力近日吸納咗唔少同佢哋理念一致嘅年輕人、專業同中產人士，下年會打正工商專業旗號，派十幾人出戰區選，同其他泛民主派同建制派候選人撼過。早前盛傳經濟動力有意拉攏獨立議員龐愛蘭加盟，Jeffrey唔肯證實，只係話任何人如果要代表經濟動力出選，唔可以插住幾支旗喺身。莫非暗示經濟動力同現時掛住C18同新論壇招牌嘅龐愛蘭無緣？