《Winning Eleven 2011》360度搓波逢人過人

早幾年《Winning Eleven》真係愈玩愈悶，形式同動作年年差唔多，但係可能因為對手愈嚟愈強關係，今年新版本《Winning Eleven 2011》就來個大革新，由頭到腳都執過晒，由控制到球員在球場上360度左穿右插嘅，到操作系統上都見到廠方絞盡腦汁。《Winning Eleven 2011》仲係史上第一次出埋中英合版，雖然睇見中文介面有啲突兀，但好在旁述方面唔會有「煲冬瓜」，PS3版仲可以聽番由名波浩同北澤豪日文講波添！

真係睇得出Konami好有心搞番好隻「鎮店之寶」《Winning Eleven 2011》，好似集中英介面、英日（只得PS3版有日文語音）語音的亞洲版《Winning Eleven 2011》的推出時間，仲比日版早兩個星期，除非係死硬派日版遊戲粉絲，唔係當然係買中英合版抵玩。

一個掣搞掂界外球

今集另一突破係一改以往的操作系統，好似以往無論係射波同傳波時，都要睇住畫面下的能量棒先知到底力度係幾多，今集就會在所控制的球員下方顯示彩色圓圈，可以更簡單地估計到傳球同射球力度。在今集嚟講力度控制好重要，要做出以往幾集易如反掌的直線傳球Through Pass或者One-Two Pass都變得較困難。同樣道理亦應用在擲界外球方面，今次可用一個掣搞掂晒，力度方面就係由按掣時間長短去決定。

節奏減慢難再屈速

《Winning Eleven 2011》其中一大賣點是開發出逾1,000種的新動作，令球員動作更像真。是玩開《Winning Eleven》嘅朋友通常揀一啲速度達九十幾的球員屈速，基本上守衞完全無得追，但今集就傾向較現實的情況，速度的分野無以往咁誇張。而且在鬥走以及盤球時跟防衞碰撞，都好有機會失平衡甩波，另外防守球員的位置感及AI都提高咗，入波難度提高唔少。但廠方為咗平衡番遊戲，都加強咗進攻球員的盤球能力，好似今集可以更自由地在球場上向360度運球，更可以連續使出各種如插花、假動作同後腳過人的高難度技術。

排陣揀卒更考耐性

相比起《FIFA 11》，《Winning Eleven 2011》嘅實名球隊同球場始終都爭啲，終歸都係版權問題；不過值得一讚係今集已經收錄到歐冠盃、歐霸盃同南美自由盃3項主要地區性盃賽，唔知下一步會唔會打埋亞冠盃。至於一直玩開的Master League模式同球員育成模式，今集都一樣有得玩，但新排陣同球隊管理模式都需要時間去適應。以往排陣時會採用上、下選單模式，今集就變為更靈活游標方式揀球員同排陣，要轉陣時要花上更多時間。總括嚟講，《Winning Eleven 2011》新改動令遊戲變得更真實，但由於遊戲速度減慢，體力衝撞較多，要追求番以前「打Form」打波嘅樂趣無咁易，但始終肯適應時代去改進都值得支持。

查詢：2359 7998