阿Sa陳偉霆熱戀煙韌攬到實

蔡卓妍（阿Sa）大方承認戀上師弟陳偉霆（William），姊弟戀成為全城熱話，昨午拍拖返港，大方任影高調晒恩愛，相反阿Sa前夫鄭中基被踢爆「撻着」有線女主播余思敏，昨日包到冚頭耷耷鬼祟遊中環。

今年初阿Sa與鄭中基的六年情玩完，宣布離婚收場，加上被爆瞞婚，令阿Sa的事業及愛情大受打擊，身心受創的她，直至遇上師弟William後，一撻即着，還拍拖三個月，而「陳蔡」亦拒絕隱瞞戀情，大方公開戀事。

自戀情曝光後，昨午阿Sa與William首度以情侶姿態公開露面，二人在助手陪同下由鄭州返港，吸引逾半百傳媒採訪，場面混亂。阿Sa身穿螢光衣戴上黑超，一臉甜蜜，起初拒絕受訪，但被記者重重包圍下，最後亦應要求企定合照，雖然沒有拖手，但William主動搭實女友香肩，兼深情對望，惟阿Sa竟然怕醜，現場有人起哄要求「拖手」及「錫啖」，阿Sa聞言拍心口彈開，並大叫：「唔係吖嘛！」

拒情侶檔演出

對於前夫鄭中基與有線女主播余思敏拍拖，阿Sa說：「如果係真，就祝福佢。（佢都祝福你？）多謝！」問到William是否其結婚對象？阿Sa笑說：「搵工都要試用期。（情侶檔接Job？）吓？盡量唔好啦！最緊要輕輕鬆鬆、開開心心、正正常常！」而William則表示不需要除去身上與舊愛Angelababy的「愛的紋身」，至於公開戀情後會否備受壓力？他說：「我相信有足夠力量去承擔，公開咗得到好多祝福，返嚟要多謝咁多位藝人朋友，大家祝福我！」其後兩人各自登上保母車離開，阿Sa到銅鑼灣錄音室後，再返回灣仔的英皇辦公室，問到鄭中基是否知道她拍拖？阿Sa說：「報紙唔係寫晒咩？」及後她坐保母車返抵跑馬地香閨。

發表肉麻宣言

此外，「陳蔡」昨晨越洋接受查小欣《巴巴閉邊個夠我查篤撐》長途電話訪問，William對公開戀情既緊張又開心，他說：「大家都有啲經歷，與其隱瞞不如公開仲好！」對於相識7年才擦出愛火，William發表肉麻宣言：「我同佢性格好似，當我唔開心時，大家都有傾偈，我欣賞阿Sa個人同心，好肉麻！」曾經歷「瞞婚之苦」的阿Sa，對公開戀事反而輕鬆不少：「我想似平常人拍拖食飯睇戲，William令我改變好大，個人唔咁執着，唔鑽牛角尖！（姊弟戀？）好多嘢需要勇氣，無論公開、同呢一行拍拖，其實唔關姊弟戀事，人大咗最緊要開心！」

另外，阿Sa接受本報電話訪問時，被問到與William在哪個時刻變成戀人？她沒正面回應：「始終係緣分，今次想公開舒服啲，我唔係一見鍾情嘅人。依家睇開咗，以前事業為先，依家生活同家庭至上。」