凍肉私房菜 似去鯉魚門

近年坊間出現不少專賣靚扒的凍肉店，幾百蚊買塊扒返屋企，唔識煮盞嘥料。最近佐敦新開了一間凍肉舖，就專為「烹飪盲」給其選購嘅頂級肉扒及海鮮配搭香草或岩鹽等調味料，還設有私人包廂，可以好似去鯉魚門歎海鮮咁，揀啱肉食就交畀廚師煮嚟食，都幾有創意。

在佐敦文英街內，有着各式食肆，平實簡單卻有不少驚喜之作，引來不少老饕嚟搵食。最近街上多了一間用落地玻璃做門面的店子，裏面全是一個個雪櫃，分別放置冷凍肉扒及海鮮，名字好有氣派，叫「皇朝飲食」。

私人包廂 即歎美饌

「皇朝飲食」表面上是間賣各式冰鮮及急凍肉食的店子，有來自美國的黑安格斯一級肉扒、日本和牛、澳洲有機羊架、新西蘭羊骨扒、法國鵝肝、愛爾蘭有機三文魚、北海道帶子、阿拉斯加蟹腳、西班牙黑豚鞍扒及不同產地的新鮮生蠔，走高檔凍肉舖路線，專門供應貴價肉食。老闆之一Matthew表示，店子由他和哥哥旋哥合作經營，客人揀啱心水肉扒、海鮮後，可即時買走，而消費滿$500更有專人免費送貨；若然想先食為快的話，亦可由旋哥即席烹調，於私人包廂內享用。不過，由於店子剛開業，暫時只得一個包廂，來之前，最好先致電預約，以免撲空。

有機調味 烹法多元

Matthew與旋哥有近30年賣凍肉及急凍海產的經驗，二人都想開設一間跟其他凍肉店有所不同的店子，因而想到加入私房菜元素，炮製方法亦經過精心設計，他們會因應肉扒的來源地及特性，而選用適當調味及煎、焗、燒、烤等製法。另外，店內亦有售多種有機及天然的調味料供客人回家烹調，包括喜馬拉雅山岩鹽、有機紅酒醋，以及有機香草、胡椒、橄欖油、豉油等，專門為烹調不同種類的肉扒及海鮮而設，認真又貼心。

「烹飪盲」學秘技

旋哥表示，如果客人喜歡買回家自煮，他樂於教路，即使是「烹飪盲」一樣可以煎到靚扒。

1.厚肉扒　煎扒邊

‧ 脂肪比例較少，因此宜先煎香扒邊才煎兩面，避免肉汁在扒邊流失。

‧ 宜用有坑煎Pan，讓接觸Pan底的扒身，可以透過坑紋的熱力均勻受熱。

‧ 煎製脂肪多的油潤肉扒前別下調味，以免油脂在受熱期間改變味道，應在品嘗時才用岩鹽調味。

2.靚鵝肝　慢火煎5分鐘

‧ 醃鵝肝不用解凍，應在鵝肝還處於結冰狀態時，以岩鹽、白胡椒及麵粉均衡地輕拍鵝肝四周。

‧ 用慢火去煎，時間視乎鵝肝大小而定，Size大如手掌的，至少每邊煎約5分鐘。

‧ 要煎得脆，一定要在未溶雪之前調味及煎製，否則變得軟又腍的鵝肝，容易煎爛。

3.海水生蠔　檸汁最鮮

‧ 食蠔最緊要睇原產地的水質及季節入貨，現時來說，來自澳洲、法國、愛爾蘭、蘇格蘭、南非、日本等地的新鮮生蠔最啱食。

‧ 調味要視乎蠔本身的味道，像海水味較重的Belon，最好伴檸檬汁吃，以突出鮮味。味道淡的則不妨以Cocktail Sauce伴食。

查詢：2947 7743