Fundman睇市：飲品股高增長不再

中國PMI的確有轉差迹象，尤以中小企業PMI為甚，而新訂單和出口訂單指數同呈回落，目前形勢得美國保持標青，歐洲則相當嚴峻，所以中國出口形勢未敢樂觀。晏晝四點左右輪到歐洲PMI陸續出爐，法國及意大利分別降至46.9及49.8，德國及歐元區雖然仍有51.4及50.7，但分別創十一個及十三個月低位。

佳績帶起半新股

一堆半新股相當活躍，包括科通芯城（00400）、康達環保（06136）、恒發洋參（00911）等，皆因中期業績相當不俗，現時新股反其道而行，唔興做盈利預測，索性給大家一個驚喜，順勢再炒多轉。

當然，亦有一些上市冇耐已發盈警，但畢竟只佔少數，例如綠色動力（01330）其實在招股書早有提及中期收入大跌，只不過會認真刨招股書的股民比例可能唔夠一成，但連呢隻股亦慢慢重上高位，所以半新股上市頭半年可謂係蜜月期，而且貨源比較容易歸邊。之不過，半年過後就要小心提防，因為班基礎投資者可能趁高減持，而上市首年業績有谷靚條數之嫌，到第二年就往往走樣，幾乎已係通病。

八月業績期終於過去，好醜已成定局，但向來有頗高增長之飲品股則令投資者大跌眼鏡，昨有匯源果汁（01886）大跌9.5%，上個禮拜有蒙牛（02319）大跌，再之前有合生元（01112），連一向好穩定之旺旺（00151）亦大幅走樣，令人關注是否行業出現問題，但飲品已係生活必需品，更同反貪無甚關連，故此較宜逐隻審視。

先講昨日暴跌之匯源，上半年少賺82%成死因，經營更大幅虧損。事實上，自從賣盤畀可樂失敗之後，匯源直至舊年業績先有起色，料不到今年又再倒退。內地飲品行業競爭激烈，匯源和旺旺均見毛利率下跌的問題，部分產品需減價搶客；另企業需要用大量開支進行推廣宣傳，成為拖累業績的最大原因，最佳例子是白雲山（00874）旗下王老吉不惜工本賣廣告同加多寶對撼。

乳業股成重災區

蒙牛上半年廣告及宣傳費用更大增1.1倍至28.6億元人民幣，用以贊助世界盃及《我是歌手》等節目；其競爭對手伊利的廣告宣傳費亦相當接近。雖然中國市場龐大，但當雙頭壟斷旗鼓相當時，或出現兩虎相爭、廣告商得益的情況。

若論整體表現最差的板塊非乳業股莫屬，合生元今年由70蚊插水落昨收市28.2元，差點以為三聚氰胺事件重現；蒙牛作為一隻藍籌股，上周四之單日跌幅亦頗恐怖，其餘輝山（06863）、雅士利（01230）及原生態（01431）也乏起色，比較似樣的僅得現代牧業（01117）。

事實上，乳業股暴跌的其中一個原因，是今年初放寬一孩政策炒過龍，其實出生率並無顯著上揚，而業績未如預期及估值偏高更使其業績後見光死，合生元僅多賺5%，蒙牛雖增長接近40%，但部分是因收購雅士利所致，而銷售成本及廣告開支升幅遠超盈利及收入增長亦令人憂慮。