山頂南區啲業主叫價比較強硬,所以交投一向唔係咁多,不過最近由於有幾個新盤推出,吸引到啲外區買家。總結上個月市況都唔錯,全個月錄到約莫11宗成交,比七月份多咗83%。由於當中有部分係價值億億聲嘅超級豪宅,所以成交總值更加勁升近三倍。

近期投資者積極入市,豪宅交投升溫。(資料圖片)

八月份山頂南區部分買賣成交

美聯方富義同劉Sir講,近期有幾個全新超級豪宅盤登記,令到山頂南區再成焦點,啱啱過咗去嘅八月份,根據市場資訊統計,合共有11宗買賣成交,涉及成交總值約16.84億元,比起七月分別升咗83%同近三倍。

南灣道屋傳賣8億

表現咁強勁係因為錄到幾宗超級豪宅成交,好似山頂TWELVE PEAKS一幢雙號屋,以4.12638億元賣出,計落實用呎價接近11萬元;而全月最矚目就係市傳南灣道35號以高約8.1億元賣出。

近期市場成交不乏名人買家,好似以5,050萬元賣出嘅淺水灣麗景園2座中層戶,買家登記係LAM KWING WAI ALVIN LESLIE,同金源米業(00677)林烱偉名字英文名字相同,個單位實用面積約2,049方呎,實用呎價約2.46萬元。

另外,近日南區都連錄成交,其中木苑一個實用面積約1,638方呎單位,以3,990萬元沽咗,實用呎價約2.43萬元;而陽明山莊7座中層49室則售3,280萬元,實用呎價約2萬元。

租務成交全月30宗

至於八月份,山頂南區租務交投就保持平穩,錄到約30宗租務成交,涉及租金總額約375.7萬元,平均每宗約12.5萬元,成個月最突出嗰單租係赤柱灘道6號單號屋,以月租約27.8萬元租出,以實用面積約3,147呎計,實用呎租約88元。

其他區呢幾日啲二手豪宅成交以千餘萬元個案為主,中原麥少基話,何文田巴富花園嘉富閣高層E室,實用面積994方呎,啱啱比個同區分支家庭以1,348萬元買入,實用呎價約1.36萬元。

該行鄧國昌話,西半山慧豪閣1座低層E室售1,300萬元,實用呎價1.74萬元。