陳茂波透露外母當初對佢印象唔好，全靠堅持，最終抱得美人歸。
發展局局長陳茂波尋日去到位於深水埗嘅美荷樓，同一群學生分享童年時住喺木屋區同大坑西邨時嘅點滴，仲有大學時期追女仔嘅經過。佢話，細個時候住木屋，家庭環境唔好，所以好畀心機讀書，希望改善屋企人生活。不過，最令佢體會到堅持嘅並唔係刻苦挑燈夜讀，反而係追女仔嘅時候。
寄語同學仔全力以赴
升上大學之後，陳茂波對同一大學嘅師妹、現時太太許步明（Frieda）一見傾心，所以就追住佢唔放。同大部分人一樣，戀情穩定之後，Frieda就帶男友返屋企見家長，當時外形又黑又瘦、頭髮長長嘅陳茂波，十足飛仔一樣，再加上係潮州人，基於民間有啲「潮州人打老婆」嘅傳聞，Frieda媽媽一度對佢印象唔多好，唔想佢哋交往添。
但陳茂波堅持不懈，無理Frieda媽媽反對，發動死纏攻勢，日日接放工，連Frieda由深水埗搬去薄扶林，佢都跟住搬，最終咪抱得美人歸囉。
佢用呢件事寄語同學仔，人生路上總有啲人唔太接納自己，但如果係真心所求，就要全力以赴、矢志不渝。
第一手消息請下載on.cc東網
