葉劉淑儀同田北辰都係性格巨星，外界一直擔心兩人合作唔嚟，遲早吵大鑊。
新民黨主席、立法會議員葉劉淑儀同副主席田北辰（田二少）都係性格巨星，外界一直擔心兩人合作唔嚟，遲早吵大鑊，但呢幾年嚟，兩人表面睇都似乎無乜問題。尋晚新民黨舉行周年大會，兩人終於有「火花」出現。聽聞兩人就「一周一行」呢個議題即席嚟場辯論，唔少黨員都聞到濃烈火藥味。
話說尋晚周年大會，有黨員探討中央煞停一簽多行時，葉劉就直認喺呢個議題上面，同田二少有分歧。佢認為收緊政策都未必係好事，內地唔少居民都好反感，尤其係深圳戶籍居民喎。田二少當然即場反駁啦，佢話始終要封頂，唔可以無限量畀內地人湧港。聽聞兩位講完後，在場冇人敢再出聲。
講番周年大會，尋晚一共有四十三人成為黨中央委員，新加入人士都來自商界，包括深圳科技控股主席王聰德，從事鑽石買賣嘅印度商人Vijay及香港金龍集團主席龔俊龍。而本身係副主席嘅鄭承隆就一如所料，榜上無名，正式退黨。
第一手消息請下載on.cc東網
