歲尾好消息頻傳，盈利創新高嘅星展有派錢計劃，佢哋決定向18,000名員工大派逾一億元「利是」過肥年，星展香港副總裁及以下每人獲派6,000蚊，新加坡員工就每人1,000蚊坡元，大利是可以袋袋平安，不過近期美元強勢，撞正新加坡金管局引導坡元轉弱，計埋「匯水」，似乎星展香港員工着數啲，每人袋多200幾蚊港元。
星展銀行嘅利是封主角過年會現身四間分行。
講開過年，星展年年都有特別利是封，封上嘅主角係一對金童玉女，今年已經係第九年出現喇，原來呢對金童玉女有名嘅，女嘅叫「星」，男嘅叫「展」，第一年喺利是封出現時仲係BB，而利是封上嘅主角亦一年年長大，家陣九歲，就係拎住風車、揮春同大家拜年嘅樣。過年期間，佢哋仲會以公仔造型現身四間香港分行添。
第一手消息請下載on.cc東網
