工黨攤位出售嘅飛鏢遊戲，負責人聲稱係「大陸製造」。
泛民政黨平時喺議會內經常將矛頭指向內地政府，又批評內地好多假貨同次貨，搞到內地市民大舉在港掃貨，而水貨客愈來愈多。不過，唔少泛民政黨，好似工黨同公民黨，佢哋喺年宵攤檔嘅部分貨品都係內地製造，唔知咁樣算唔算自打嘴巴呢？此外，工黨同社民連都被指唔守信用，竟然以超高價兜售屬於非賣品嘅雨傘飾物。
我哋呢幾日巡過維園年宵，發現工黨攤位出售嘅飛鏢遊戲，負責人聲稱係「大陸製造」，但又無標明產地，反而另一啲布袋，就講明係「香港製造」。至於公民黨嘅貨品，其中售賣一百八十八元嘅「香蕉」雨傘，店員講明係內地製造，部分貨品同樣無產地標籤。如果咁睇唔起內地貨，點解又要賣呢？
售「同傘」飾物掠水捱批
早幾日有網民發現，有專門製作雨傘飾物嘅組織「同傘」，分別向社民連同工黨供應一批雨傘飾物，而且講明該批飾物係非賣品，只可以免費派發，或象徵式收取兩元五角。可惜工黨同社民連都無咁做，仲以五十元高價兜售，認真掠水，結果惹來網民批評。
第一手消息請下載on.cc東網
