林大輝捧住年糕拜個早年，祝一班高官要放下身段聽取民意。
農曆新年有假放，廠商會嘅立法會代表林大輝會飛去泰國玩幾日，尋日佢提早同大家拜年，大輝講到明如果政改唔通過，下屆都好大機會唔再參選。
咁佢對下屆廠商會代表又有乜推介呢？大輝唔肯講太多，只係話廠商會會長傳統上唔會兼任議員，但傳統可以打破喎。
其實無論政改通過與否，大輝都幾可肯定唔會留喺工業界功能界別，問題係佢會唔會有決心轉戰直選，或者入埋自由黨。不過，佢尋日就話目前未有定案，如果政改否決咗，續做議員都無乜意思喎。講到入黨一事，大輝話，雖然廠商會轉咗會長，但無向佢施壓，但佢估計廠商會都唔想有議員係代表另一個政黨。
至於未來廠商會嘅立法會代表，有傳現任副會長吳永嘉同會長李秀恒都有意角逐。大輝無話睇好邊個，但有人問到佢會長可否兼任議員，佢就好坦白話呢個係不成文傳統，但唔代表唔可以打破。唔知佢咁講係咪想暗示啲咩呢？
第一手消息請下載on.cc東網
