張宇人雙手托頭，疑似亦難敵睡魔。
由於教育局局長吳克儉、財經事務及庫務局局長陳家強等人前日喺特首宣讀施政報告期間，被發現公然瞓覺，多位局長尋日喺特首出席立法會答問大會期間，全程睜大隻眼唔敢耷低頭，費事再被人影到。雖然局長們打醒十二分精神，但一眾坐喺樓上官員席嘅副局長就無吸取教訓，個個化身「睡寶寶」，直到答問大會臨近結束先瞓醒。唔知係啲議員提問無新意吖？抑或一班副局長唔夠瞓呢？
一眾副局長喺答問大會期間齊齊瞓着，邱誠武（前右三）更加瞓足一個鐘。
前日被指「政治不正確」嘅劉皇發（左）尋日改戴淺藍色呔。
大會開始唔夠半個鐘，戴住耳筒嘅運輸及房屋局副局長「邱副」邱誠武率先進入夢鄉。坐喺佢隔籬嘅食物及衞生局副局長陳肇始喺幾分鐘之後亦不敵睡魔侵襲，俯身兼耷低頭瞓着咗。坐喺旁邊嘅勞工及福利局副局長蕭偉強開頭時都有聆聽議員發言，但好快就「投降」瞓着咗。勞福局發言人澄清，蕭偉強當時並無瞓覺，話佢當時「頭郁郁」只係做伸展動作喎。
除咗一班副局長開會唔夠專心外，立法會主席曾鈺成亦出現「走漏眼」情況。話說佢喺趕走社民連梁國雄等人離開會議廳後，又裁定工黨李卓人嘅言論有冒犯性。阿人喺提問後，一度向特首方向行去，嚇到在場保安如臨大敵，而曾鈺成亦要求阿人離開會議廳。殊不知阿人喺呢個時候轉身，同坐喺最前排嘅公文袋梁家傑握手，然後先施施然離開會議廳。
阿人被逐 離奇折返
不過，阿人喺十幾分鐘後突然行番入會議廳，似乎唔知道曾鈺成已經下咗「逐客令」。直至答問大會尾聲，曾鈺成聽到阿人插嘴講嘢，先至如夢初醒，提醒阿人已被佢逐出會議廳，唔明阿人點解仲可以入番去喎。
另外，前日開會因為戴咗鮮黃色呔而要急急當眾除呔嘅劉皇發，尋日就改戴淺藍色呔，被問到戴藍呔係咪要顯示「政治正確」，發叔就風騷回應一句：「你都可以咁講嘅。」
第一手消息請下載on.cc東網
