官淫勾結唔剷除 淫審諮詢枉做騷

潮流興拉布，唔止立法會鍾意玩，連官府亦經常左兜右轉遊花園，有姿勢冇實際，仲慘過拉布。

呢，商務及經濟發展局○八年已經話要全面檢討《淫褻及不雅物品管制條例》，點知一直拖拖拉拉，咁多年嚟幾乎原地踏步，第二輪公眾諮詢今個月中至完成，比起議事堂上嗰班口水多過茶嘅政客，官府拉布直頭有過之而無不及喇！

唔怪得民間團體紛紛質疑，所謂諮詢根本就係做騷。冇錯嘞，當局連「淫褻」、「不雅」嘅定義都冇納入諮詢範圍，擺明敷衍了事，想唔畀人話做騷都幾難。正如有團體話齋，淫審制度含糊不清，隨時扼殺創作空間，令市民誤墮法網，淪為「淫審廿三條」，都咪話唔得人驚。唔係靠嚇o架，當局連世界知名藝術品「大衞像」都評為不雅，仲有乜嘢事做唔出吖！

查實，相對於扼殺創作空間，當局親疏有別，採取雙重甚至多重標準，為害更大，更得人驚。何謂「淫褻」，何謂「不雅」，毫無標準可言，一切由淫審處話晒事，想點樣評就點樣評，結果搞到亂晒大龍。嗱，同一輯外國女星性感相，登喺東方報業集團旗下報紙被評定為不雅兼罰款，登喺反中亂港壹淫媒旗下爛果報就被評為非不雅，登喺本港有售嘅外國雜誌，直頭連送檢都慳番，一輯相片三種評級標準，細路仔都睇得出係乜嘢事喇。講到尾，港英餘孽最擅長嘅就係玩選擇性針對，叮！

最好笑嘅係，當局煞有介事建議提高刑罰，其中發放不雅物品首次定罪最高罰款增至八十萬元，監禁維持一年，再次定罪最高罰款增至一百六十萬元，監禁增至兩年。聽落似模似樣，可惜又係得個講字。試諗吓，壹淫媒旗下刊物違例過百次，次次都係罰款一萬幾千算數，幾時試過依法量刑吖？又有邊個坐過監吖？

所以話，世不患無法，而患無必行之法。如果當局唔改變選擇性針對嘅做法，仲係繼續打壓正義傳媒，包庇淫賤傳媒，就算點樣檢討，點樣諮詢，點樣提高刑罰，都係嘥氣嘅啫，不如慳番好過。

太一叮都係嗰句，淫媒固然可惡，包庇淫媒嘅餘孽更加可恥。「慶父不死，魯難未已」，官淫勾結唔剷除，香港社會嘅烏煙瘴氣都幾難消失，叮！