Metal Robot魂 RX-93-ν2 Hi-νGundam
建議零售價：$909.9
就算你唔係高達迷，不過只要有上facebook，都一定知道邊個係阿寶/阿姆羅（Amuro Ray），佢喺《Z Gundam》嘅其中一句對白︰「人類總係重複同樣嘅錯誤」成為潮圖，堪稱萬能Key。阿寶唔只「看透」世情，佢仲係高達世界中與馬沙齊名嘅神級男主角，但凡佢駕駛過嘅MS，幾乎統統成為名機，尤其是被視為「阿寶之最後座駕」嘅RX-93-ν2 Hi-ν Gundam，只要一旦商品化，無論大與小、模型或者完成品，例必被高達迷秒殺，口口聲聲呻窮，依然唔買唔安樂，人類果然鍾意重複犯錯。
新舊版本同場比較，「Metal Robot魂」（左）落足滲線，比「Robot魂」Detail得多。
雖然「Metal Robot魂」嘅飛翔炮多咗Marking及細位塗裝，不過竟然冇咗「Robot魂」（上圖左）特效組件，玩味跌晒Watt！
全身大部分關節都改用金屬製成，擺甫士穩陣得多，唔再咁易「不舉」。
「Robot魂」（下）成隻都係膠件原色，相反「Metal Robot魂」嘅每片外甲都有噴油之餘，細節位仲加多咗顏色，當堂唔同晒。
「Metal Robot魂」（上）比起「Robot魂」多咗唔少Marking細節，小腿正面底部就可見一斑。
將「Metal Robot魂」（右）同「Robot魂」拍埋一齊，就會發現前者做足全身塗裝，質感真係Sharp過後者好多。
武器與「Robot魂」一樣，落齊Beam Rifle、Hyber Bazooka、Beam Saber及大盾，唔知遲啲會唔會學MG模型版本，出多套HWS Expansion Set呢？
呢張圖經facebook廣泛流傳後，就連唔睇高達嘅人，都知道阿寶係何許人也。
喺《馬沙之反擊》中，馬沙（左）與阿寶呢對宿敵最後生死未卜，至於外傳故事《貝積嘉之子嗣》，貝積嘉就懷有阿寶嘅骨肉，總算係英雄有後。
喺正傳劇場版故事《馬沙之反擊》中，駕駛RX-93 ν Gundam嘅阿寶，最後與宿敵馬沙生死未卜，至於平行時空嘅外傳故事《貝積嘉之子嗣》之中，阿寶下場不變，但座駕換成RX-93-ν2 Hi-ν Gundam，故此被視為佢嘅最後座駕。近年嚟，Bandai擺明當咗Hi-ν Gundam係會生金蛋嘅鵝，先有模型版本嘅MG Hi-ν Gundam Ver.Ka，再有完成品嘅「Robot魂」版本，估佢唔到後者仲可以嚟個一雞兩味，加入「超合金」元素，搖身變成全新系列「Metal Robot魂」，睇落好似係新瓶舊酒，仲值唔值得各位玩家入坑？
換料加磅60g
如果遠睇嘅話，「Metal Robot魂」Hi-ν Gundam同之前嘅Robot魂版本真係唔覺有大分別，輪廓一模一樣，同樣高140mm左右，不過有名你叫，「Metal」喎，自然墜手過全塑膠嘅「Robot魂」多多聲，筆者用電子磅秤過，「Metal Robot魂」約重190g，比起「Robot魂」多咗60g，「超合金」呢個招牌，果然冇掛錯。不過對筆者嚟講，墜手只係虛榮感，最緊要都係啲金屬Parts是否用得其所。其實「Metal Robot魂」Hi-ν Gundam嘅外甲依然係塑膠製品，金屬部分全部落喺關節位，包括膊頭、手肘、髖位、膝頭及足踝，甚至手腕嘅Ball Joint都係，耐用及受力程度，當然比「Robot魂」好得多，筆者試玩時專登將啲手腳左扭右擰，關節係然硬淨，唔似「Robot魂」咁易手軟腳軟。
升格全身塗裝
用料升級之餘，外觀同樣大翻新，雖然主體沿用「Robot魂」，不過所有外甲都有塗裝處理，就連部分嘅金屬關節，例如手肘及膝頭嘅圓位，以及小腿背後嘅噴射口都有金屬塗裝，唔似「Robot魂」只有膠件原色欠缺質感，而且「Robot魂」一向欠奉嘅滲線細節，「Metal Robot魂」終於做番足晒，仲多咗好多Marking，例如燃料槽多咗地球聯邦軍「E.F.S.F.」，以及小腿正面底部嘅「CAUITION」等等，故此即使Size依舊，但「Metal Robot魂」都畀到玩家更精細嘅感覺。不過喺附件方面，「Metal Robot魂」真係唔插唔得，佢嘅官方稅前標價係¥9,800，比「Robot魂」足足貴咗¥4,300，武器冇多到之餘，仲刪除咗「Robot魂」附有嘅飛翔炮特效組件，以及將飛翔炮與主機連接嘅透明支架，只係補番個黑色地台，咁講法，如果之前冇買到「Robot魂」嘅話，就冇得黐佢啲Parts嚟用，擺唔番飛翔炮全開嘅甫士啦？定係留番嚟出「魂Shop」網購Boxset，又想刮多筆？
查詢：2433 1828（瑞華行）
Dick
