股海實戰：TCL通訊中線吸納

在金魚缸所見，其實長線持有長實和黃的老散並不太多，重組影響較廣泛的，相信係長和同長地兩間新公司成立及掛牌過程中，指數相關產品如強積金同盈富基金（02800）將會如何安排，指數服務公司又會唔會有特別處理，這些都有待釐清。

另一角度係，每次超人系內有大動作，緊接下來大市都會有大幅波動，今次會唔會有例外，不得而知。但阿莊總覺得，投資冇一本通書可以睇到老，昔日主導港股的英資、港資，已逐步由中資取替，市場就係咁現實，可平常心看待之，一個時代結束，也許意味一個新時代開始！

長和合力撐住港股

缸中人對於「潮流」變化也許睇得較開，因為金魚缸風尚正是時刻在變。好似上周五炒過一浸的醫藥股，尋日笠笠地，上周熱炒過的核電股都靜番晒，僅汽車股表現算係較堅挺。其實尋日恒指衝上24,000點關收市，多少係由長和重組消息帶動，扣除相關因素，港股應跟隨A股調整，板塊炒作情況亦見收斂。

手機股TCL通訊（02618）上月手機及其他產品總銷量按年增長38%，其中海外市場按年升25%，中國市場按年升2.1倍，成績不俗。若以全年計，手機及其他產品累計銷售量按年升33%，其中海外銷售升31%，中國銷售按年升58%。

阿莊早前都有提過，在分析手機股時，不要老是把TCL通訊與其他主營內地市場的內地手機股一概而論，皆因TCL逾九成利潤是來自海外市場，是內地手機品牌但專營海外市場，近年毛利率相對穩定，不能與主營鬥到爛的內地市場供應商直接比較。

最近，TCL通訊宣布正式收購Palm，以進軍美國市場，市場對收購行動反應正面。不過，觀其股價走勢，由去年七月高位10.96元，反覆回落至去年十月低位6.7元水平，上周再次跌近該低位後終現支持，尋日收報7.31元，升6%。以現價計，其一五年度預測市盈率才6倍，睇牌面論估值真係沽唔落手。假設去番市盈率8倍，每股都值9元，中線跟進，不跌穿雙底支持6.7元水平可續持有。