Sun世代：打完前鋒當政壇後衛

土瓜灣的「風景」盡是舊樓一堆堆。服務此區的楊振宇，也是句句話都圍繞着復修重建。「老業主好慘，政府唔重建，佢哋又無錢搬！」舊樓街坊待他如兒子般親切，不時約他飲茶，但他都一一婉拒，而區內涉及利益重重的招標、維修和收購，更讓出身草根的他，時常提醒自己，做事清廉至緊要，「有嘢傾，最好去辦事處，飲飲食食就免喇。」這位滿腔熱誠幫人的後生仔，從政起步自○三年七月一日。

「天井有隻貓死咗、大廈堆滿垃圾，我都會處理。」在土瓜灣當社區統籌主任四年的楊振宇，年僅二十八歲，一派乖仔斯文形象，老街坊愛叫他「阿楊」，事無大小都向他求助。訪問期間，阿楊的辦事處就來了幾個舊樓業主，見他桌上堆滿法團、維修文件，還要跟進街坊有關樓宇更新大行動的資助申請，「工作可以話排山倒海！」可是他並無怨言。

工作生涯中最棘手的，要數土瓜灣十三街的重建計劃，「講咗十年都未成真，甚至有啲業主已過咗身……」一臉純真的阿楊，不禁唏噓。「嗰十二幢舊樓涉及嘅業權又多又複雜，大部分業主已搬走咗，只有租客住喺度。其實政府根本無心搞重建，依家批錢畀業主維修，但進度好慢，我哋（地區人士）唔理就無人理。」

利益瓜葛要劃清界線

說到維修舊樓，便要做招標工程，這意味着利益千絲萬縷，作為政壇新丁，阿楊亦顯得格外小心，「有人叫我出去食飯傾嘢，我諗都係唔好喇，喺辦事處傾方便啲！」但當記者問他，跟進這些業權複雜的舊樓，有否擔心過得罪人而被斬，他反而無有怕，「行得正，企得正，使乜驚，最多行大路囉！」利益瓜葛的確要劃清界線，但婆婆一番好意找他飲茶，他也婉拒：「佢請我唔係，我請佢又唔係，索性傾偈算啦。」有人送禮物食物，他都謝絕，打趣說：「送心意卡夠了。」他的謹慎，也許是要向母親證明自己走對路。

今天他熱心投入地區工作，當初其實沒有偉大的政治夢，純粹「想知議員做啲乜，同埋鍾意幫人。」從政的助燃劑，來自○三年的政治覺醒。「大學畢業嗰年正值沙士時期，覺得七．一遊行要走出嚟、要發聲。」媽媽叫他從商，找份穩定高薪的工作，他不肯；再勸他打政府工，他更斬釘截鐵：「當時政府不得人心，入咗去都幫唔到人。」結果，民協請他做組織幹事，繼而出選區議會、立法會，但他說，媽媽至今仍常叫他「唔好搞咁多嘢」，認為從政吃力不討好。

出身基層知窮人需要

阿楊出身基層，兒時和父母、姊姊住屯門公屋，中學時期才搬到九龍區，自小知道窮人蝸居苦況，「放學之後，就匿埋同學嘅板間房、天台屋打遊戲機。」現在應付舊樓問題亦得心應手，看街坊不斷找上門，證明他已討得不少人歡心。

「我年紀唔細，要踢後衞喇。」小學已是街邊「波牛」的阿楊，自言80後已經不年輕，在政界立足亦要改變，「依家十二、三歲就去反高鐵、衝鐵馬，企喺前線發聲，相當於球場嘅前鋒。我哋要開始退守，做好地區服務，好似後衞咁堅守陣地。」

Ronald's profile

楊振宇

年　齡：28 歲

現　職：社區統籌主任

學　歷：香港浸會大學政治及國際關係學士 、社會科學碩士

興　趣：足球、行山、捉棋