Turbo發威Porsche Cayenne GTS

買得起保時捷（Porsche）Cayenne嘅車迷，相信好多都對性能有高要求，三、四百匹馬力點都唔少得。最近廠方加推全新GTS版本，引擎由過往嘅NA改為Turbo，馬力更大，但耗油量不升反降，平均每公升燃油可以行到10km，以440hp四驅SUV嚟講都算係咁，畀多$10,000左右就可以加埋Sport Chrono Package，0-100km/h只需5.1秒，好多跑車都唔係佢嗰皮！

Porsche Cayenne GTS

車身離地距可升降調校，對應On-road與Off-road的不同需要。

車身備有四個鏡頭，可合併出鳥瞰圖像。

車尾設有頂置式尾翼，而且整合了煞車燈。

內籠布局相當運動化，而且不失豪華氣氛。

原廠配置了GTS跑化座椅，並有八個方向電動調校功能。

安全帶、轉數錶底色及縫線都可選用Carmine Red，不過屬於額外選配項目，要另行收費。

Facelift後的Cayenne GTS改置Turbo引擎，容積少了，但馬力與扭力反而有所提升。

Cayenne有多個動力版本選擇，要幾快都有，不過Cayenne Turbo及Turbo S嘅車價相對離地，如果對性能有番咁上下要求，又唔想大拿拿畀二百幾萬買部車，大可選擇Cayenne GTS。平心而論，四百幾匹馬力嘅四驅SUV，又冇Hybrid混能系統，好難要求低耗油，不過Cayenne GTS嘅「食量」又唔算過分，廠方公布嘅綜合耗油量為10L/100km，就算打個八折都唔錯。若果經常要開長途車，駕駛風格又激進，對油缸容積嘅要求自然較大，代理似乎也深明此理，能夠為客人將油缸加碼至100L，而且係No-cost Option，夠窩心未？此外，Cayenne GTS嘅Tiptronic S波箱設有八前速，喺東區走廊以穩定車速巡航，70km/h左右已經升到第八個波檔，轉速僅約1,200rpm，對提升燃油效率有直接幫助。

全時四驅信心十足

今次測試嘅Cayenne GTS屬於Facelift型號，但改動不僅限於外觀，就連動力配置都有大動作，為咗減排，原來嘅4.8L V8自然吸氣引擎被3.6L V6雙渦輪增壓取代；又係Turbo？係呀，冇辦法，鬼叫性能好又慳油。對比之下，新Cayenne GTS嘅馬力比Facelift前多咗20hp、扭力就多咗8.7kgm，耗油量亦減少咗0.9L/100km。至於全時四驅屬於標準設備，預載咗PSM及ASR等穩定系統，喺濕滑山路上快跑，循迹性依然好強，只有一次盡油起步時，輪胎出現過輕微打滑，雖然筆者無法精準量度輪胎打滑咗幾耐或者Spin咗幾多個圈，但相信喺半秒之內已經被系統修正過嚟，予人無比信心。

全車內外戰意濃烈

Cayenne GTS嘅外觀比Cayenne S更有氣勢，車頭大型進氣口、頂置尾翼以至運動化擾流套件，將Cayenne嘅跑味變得盡形於外，而且延伸到車內，轉數錶底色、縫線及安全帶都可選用Carmine Red，配合GTS跑化座椅及Alcantara麖皮內籠，置身其中令人血脈沸騰。今次測試嘅Cayenne GTS已經裝咗氣壓懸掛，又有升降功能，高速行車會自動降低車身，藉此增加穩定性；改喺崎嶇路面行駛，駕駛者亦可自行升高車身離地距，操作簡單快捷。其餘升級選擇就有全景觀天幕、21吋輪圈、附設Surround View功能嘅Park Assist、四區域恒溫冷氣及BOSE音響等，要幾豪都有，對隨車設備有極高要求嘅客戶，相信都難有挑剔。