Kyocera Torque G02東洋硬派

來自日本的Kyocera（京瓷）出品嘅陶瓷刀具既實際又耐用，原來出手機都一樣咁堅，啱啱由日本水貨到港嘅Kyocera Torque G02外表一睇就知硬淨，功能大玩戶外風，仲支援MIL-STD-810G美國軍事防護標準，水、塵、跌落、震動、高溫、低溫等極端試驗全部通過！

Torque G02採用實體鍵，反應、回彈都不俗。 $5,880

雙喇叭仿蜂巢設計，機背中央用上拋光物料，外觀唔錯。

microUSB及耳機都設有保護蓋，使用時稍為不便，不過要加強保護就無計啦！

採用nanoSIM，亦支援microSD。

除了背殼，電池表面亦設有保護蓋，雙重保險。

機側設有「Direct Button」，可以設定開啟指定程式，例如電筒等。

此為《Sky View》，將主鏡頭對住天空就可以找到星座位置，觀星必備。

戶外功能一覽

通過21項防護測試

單睇G02外觀，相信各位都估到佢係三防手機，機身以硬身塑膠物料包覆，機背四個角位用上螺絲加強防護，中間「TORQUE」字樣位置仲刻意設計成盾牌狀，加強粗獷感覺。防水、防塵已經成為日系手機嘅基本防護標準，但作為真正三防手機，區區防水防塵係唔夠嘅！G02就通過咗MIL-STD-810G美國軍事防護測試，包括防水、防塵、1.5米高空跌落、震動、陽光直射、防濕、零下20℃低溫操作、50℃高溫操作、低壓、鹽水、結冰等19個項目，加上耐海水、100kgf負重兩項Kyocera獨家測試，總共21項測試，G02全部Pass，任你去到天南地北，全天候頂得住！

貼心設計合戶外用

為方便大家喺濕水、結霜、泥濘等極端環境下操作，G02特別用番實體主頁鍵同埋返回鍵，機側另設有拍攝鍵及容許用家自訂功能嘅「Direct Button」，唔使局限篤芒操作，戶外使用就靈活得多。此外，新機仲有唔少實用功能，包括將傳統聽筒設計改為Smart Sonic Receiver，透過屏幕震動傳遞聲音，預防聽筒被水滴、污物遮蔽而影響通話；機背有特大雙喇叭，音量輸出達100分貝，身處嘈雜環境都可以聽到來電鈴聲。順帶一提，廠商仲推出「Hard Holder」及「Floating Strap」兩款另購配件，前者設有攀山扣，方便將手機扣於背囊或腰帶上，後者為一條備有小浮床嘅手機繩，令手機落水時不會下沉，「戶外控」必定要入手。