股海實戰：券商股估值提升

美國聯儲局一如預期推QE4，本應屬好消息，偏偏喺擔心美國財政懸崖以及A股回吐之下，恒指尋日不升反跌57點，成交626億元。一線股抖氣令指數偏軟，反觀二、三線人氣旺盛，各個板塊輪流發力，可以繼續炒股唔炒市。

尋日提及嘅光伏股一日貨仔就現回吐，惟見保利協鑫（03800）沽壓不致太大，睇吓抖完氣會唔會如期衝上高位1.61元。愈來愈多「沉睡股」起動，好似尋日雨潤食品（01068）都開車，股價曾高見5.39元；反而蒙牛乳業（02319）就好似拉牛上樹咁踢極都唔郁，股價跌0.7%收場，睇走勢圖，今年以來股價多次回落至20元邊就止跌回升，睇吓今次有冇例外！

阿莊按前日預告沽出李寧（02331）食胡，再買入滬杭甬（00576），雨潤及中旅（00308）。滬杭甬不跌穿5.7元繼續持有；雨潤若能升穿5.42元，可向5.8元進發，否則短炒可先行食胡；中旅成功抽穿1.68元可反覆上試年初高位1.8元水平，重要支持喺50日線1.5元。

受惠熱錢流入，呢個月大市交投有所改善，港交所（00388）受惠，尋日股價曾高見131.3元，收報131元，升0.9%，終於返家鄉。其實，券商股估值亦可望獲得提升，本月以來見到國泰君安（01788）同海通國際（00665）成交明顯增加，買盤密密吸納，值得關注。

國泰君安同海通國際母公司喺內地券商界手執牛耳，而兩者則為其母公司屬下在港上市、經營香港業務嘅子公司，呢一點看官唔好搞錯。隨着兩地金融服務業進一步融合，呢兩家香港券商背靠實力母企，喺拓展兩地財富管理等金融服務領域及創新金融產品方面均有一定優勢。

海通業務表現出色

今年上半年，國泰君安中期純利同比跌15%至1.34億元，期內貸款及融資利息收入上升。至於海通，同期則多賺42%至1.5億元。以現價計，兩者市盈率同息率都差唔多，但論業務發展，則海通嘅企業融資業務表現較出色。若然睇好呢轉熱錢流入及內地經濟復甦可帶動兩地魚缸步出「沙漠」，重現活力，呢兩隻券商股都諗得過，其中國泰君安短線回吐守穩250日線2.33元可關注，至於海通向上重大阻力喺3.4至3.5元區域，回吐宜守穩50日線2.78元。