Fundman睇市：加注內銀股未係時候

上星期五晚美股認真刺激，先跌220點，最後倒升134點收市，假如無留意新聞，仲以為聯儲局主席伯南克在Jackson Hole上有驚天地、泣鬼神的演說。但查實演說內容新意欠奉，幾乎是八月議息聲明的copy and paste，大致上是說聯儲局會在需要時出招刺激經濟，可是詳情及路線圖就完全無。股市先挫後揚走勢，應該同講話無關，不過係過半數賓架有晒心理準備無新一輪QE出台，無驚喜的內容反而令唔少short cover推高華爾街股市。

「有需要」這個字，絕對係可圈可點，意味着美國經濟愈差勁，聯儲局推QE3的機會就愈大。展望下星期，美國八月份PMI、ISM及就業數據排住隊出籠，依家估PMI由七月58.8跌到52.5，ISM由50.9跌至48.5，跌穿50代表由擴張變為萎縮，新增非農就業職位亦估緊由15.4萬跌至11.1萬，到底夠衰未？萬一仲要比市場預測更差，屆時華爾街係為終於等到QE3而高興，抑或怕經濟雙底衰退，筆者認為係五五波。上星期股市反應咁好，只怕係一次跌市之中的死貓彈，點睇都無咩值得咁早慶祝。

人行未有放水迹象

上星期五，內銀股虎頭蛇尾，史提芬有個大行老友話，早市有間美資行大鑼大鼓，話因為出口近幾月明顯放緩，人行唔使幾耐就會開始掉頭減存款準備金率，建議客戶可以開始將沽空倉的倉底減低，殊不知，午後A股內銀普遍倒跌，將內銀H股都拖埋落水，最搞笑係人行不單止無減存款準備金率，傍晚仲宣布將商業銀行保證金存款，納入存款準備金繳存範圍，此舉等於即時將8,000億人民幣資金凍結，亦等於一次過加三次各0.25%的存款準備金率。事件反映人行無因為歐美經濟弱過藥煲，而在短期內有掉頭放水的計劃，中國通脹成功壓制前，緊縮手段仲有一排玩，樂觀睇最快第四季，即使緊到明年初，都唔令人意外。

內銀股陸續公布的中期業績，與疲弱不堪的股票走向嚴重背馳，像工商銀行（01398），半年已賺過千億，純利1094.8億元（人民幣．下同），增長29.4%，難怪老總在記招會被問到點樣睇疲弱股價，都表現得相當無癮，認為市場錯估形勢，無理由睇淡這間全球最賺錢的銀行。

上半年分析員預測工行賺1,027億至1,089億元，今次超越上限，相信短期大行會陸續調高全年度的預測，以1.76萬億港元市值，換算成人民幣大約是1.42萬億，以預測的2,028億元盈利，市盈率只得七倍，按傳統智慧是相當便宜，可惜內地企業貸款減值以及地方政府債務問題的陰霾揮之不散，尤其目前內銀的貸款減值佔總貸款比例，處於歷史性的低位，中線而言有回升的可能，這情況將令內銀股難以取得理想估值，高位買落的，筆者會建議繼續持有等收息減低損失，但如果想在內銀加注，看來仲未係時候。