Fundman睇市:內銀股咪亂博反彈

成日話人有破壞無建設,其實,無破壞又邊得有建設?

前大摩名嘴碧斯勸諫美國政府,美國經濟經歷QE1、QE2後,依舊藥石無靈,應倣效一九三○年羅斯福政府年代,成立工程發展局,搞大型公共工程刺激經濟,創造就業機會,哪怕是在大小公路掘掘補補,總之要令更多工人有工開。

日本央行調查顯示,經歷三月大地震之後,日本消費者信心指數跌至-59.5,大幅低過三月時調查的-42.3,創歷史新低。不過,股市走在經濟之先,尋日日經指數完成七連升紀錄,報10,082點,回到三月大地震後最高位,皆因大孖沙深信,日本核洩漏危機,唔單止災後重建為企業帶來更多機會,政府終於為所有國內電廠進行大規模壓力測試。可以預見,未來有供電系統由核電轉到火電及可再生能源的固定投資增加,對經濟有提振作用。

負面消息雙重夾擊

大市焦點係淡馬錫大手減持中行(03988)及建行(00939),加埋穆迪指內地可能有3.5萬億元(人民幣.下同)地方政府債掃咗入地氈底,這批違約風險更大嘅債務,隨時令內地銀行體系承受衝擊。兩單消息夾擊下,早市港股竟得百零點跌幅,直到歐洲開市見紅後,好友真係頂唔住,恒指插230點,收報22,517點。七月期指繼續低水,收22,470點。

尋日10大沽空金額股票,6隻係內銀及內保股,咁多壞消息,大市居然捱到下午至插水,大戶高位不動聲色的做淡,技術之高超,只能寫個服字畀佢。收市後人行終於宣布遲來的加息,存貸息各升0.25厘,大戶有無押對注碼,今日會有答案。

淡馬錫揸咗105億股中行,一次過沽掉51.9億股,幾乎是持股量的近半,而且淡馬錫係中行街外最大股東,比社保基金持股100億股仲要多,佢遲唔沽、早唔沽,揀中行股價貼住一年新低都要減持,可見穆迪提出3.5萬億元地方債的問題,即使唔信佢十足,都至少要信佢五成。在內地出口放緩,PMI跌近50的臨界點,內地銀行業的壞帳問題,或要比我哋想像中麻煩得多。

自從中央重組內地銀行業不良貸款,分批上市擴大資本以來,近年內銀股的不良貸款比例不斷改善,但經營情況愈好,估值反而愈低,由○六年的二十至二十五倍市盈率,到今時今日得7.2倍,仲要比策略股東離棄。

估值反映市場憂慮

一葉知秋。像淡馬錫一類的主權基金,都相信花無百日紅,尤其經歷金融海嘯,中央4萬億元基建有多少變成大白象、投入無效益的基礎建設?無人知,但可以肯定,進一步催化地方債務問題惡化,最後又係要幾間內地銀行捱吓義氣,這幾年的「估值壓縮期」,正係反映市場對此之憂慮。

粗略計算,以中行去年資產減值損失等於總資產1.13%,金額是130億元,若資產減值損失升到2.5至3%,估值都係十至十一倍左右,但問題會唔會比這個假設嚴重,係博反彈需要考慮的因素,但美銀手上建行禁售期快將屆滿,短期支持內銀反彈的因素唔多,即使平,都係等吓先好。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

史提芬