李家鬧爆大話精

無綫花旦楊思琦突然宣布飛甩拍拖9年的李泳豪,以及傳出「有喜」,令事件耐人尋味!昨晚她終於開腔回應,一度哭成淚人!而李家鼎及李泳漢獲悉思琦哭訴後,即代豪仔出頭,鬧爆思琦講大話!

楊思琦早前宣布分手,豪仔一直表示不知「分」訊,有傳思琦另結「新歡」Andy Ng及「有喜」,封嘴多時的思琦繼澄清疑似「第三者」是同學後,昨晚又哭訴心中情,豪仔得知思琦的絕情宣言後,泣不成聲,傷心得拒聽電話!本報記者在李家守候時遇上李泳漢拖狗落樓,提起思琦的訪問,他即激動怒罵代豪仔出頭,而父親李家鼎更句句爆粗以洩心頭之恨!

記:記者 漢:李泳漢 鼎:李家鼎

記:豪仔有冇睇思琦嘅訪問?

漢:佢知!佢心情同成家人一樣,好心痛!好多朋友睇到佢個訪問都話戥細佬好唔抵!唔明點解思琦唔講真話去還豪仔一個公道,要講大話掩飾?我哋手上有好多嘢去證明我哋講嘅係真,唔公開係唔想任何一方受傷害。我哋由始至終只想講事實,對思琦為自己同新歡講大話好失望!

記:知道Andy Ng喺微博中指真相被歪曲?

漢:好多朋友同我講咗,我都好激氣,真相一早出咗嚟!唔明仲有乜真相?如果係男人就企出嚟講,唔好放暗箭,要個女人出嚟講,以前都係豪仔企出嚟幫思琦擋!

記:豪仔情緒點?

漢:佢聽到思琦咁講更傷心,唔知點安慰佢,成家陪住佢怕佢會出事,我幫手照顧佢同思琦第一隻狗「懵懵豬」!

鼎爺爆粗寸最叻喊

至於李家鼎對思琦哭訴心聲,即時扯火爆粗拿出證據,怒插思琦大話連篇!

記:思琦話2、3月同李泳豪分手?

鼎:佢話2、3月有共識都多×餘,佢嗰時仲嚟我屋企同隻狗玩,又嚟同我哋食飯,5月豪仔生日佢都有嚟!我敢話佢哋喺呢段日子百分之二百冇分手!

記:確實日子係幾時分手?

鼎:我乜都唔知,佢話分手係上月26號,3、4日之前仲過嚟片場陪豪仔消夜,第二晚又再嚟,如果佢哋一早有共識分手,我仲同佢食飯咩?當我傻o架?

記:思琦喺訪問中喊得好犀利?

鼎:佢最叻係乜呀?佢最叻就係標眼淚,最醒就係一哭二鬧三上吊!

記:思琦話想搵個照顧到佢嘅人?

鼎:佢唔係搵到喇咩?又搵多個,搵埋第三個呀?講×埋啲廢話!

記:傳思琦請假9個月,係唔係暗示啲乜?

鼎:佢想點就點,唔×關我事!

記:依家泳豪情況點?

鼎:我日日都陪住佢、安慰佢,佢初戀拍咗9年拖咁就分手,個人梗係晃吓晃吓啦!我唔畀佢揸車o架!費事大吉利是。

影視組

李泳豪驚聞楊思琦的「心聲」 後,傷心不已。(資料圖片)

李泳漢昨晚帶着豪仔與思琦一齊養的「懵懵豬」落街散步。