思琦哭訴早分手

早前楊思琦突然單方面宣布與同居男友李泳豪分手，外間揣測多，有指因有第三者，甚至傳思琦「有喜」！而癡心的豪仔日前落淚剖白不捨感情，直至在昨晚播出的《東張西望》中，輪到思琦回應，有傳「有喜」的她向無綫請假9個月！

主：主持　琦：楊思琦　

主：幾時分手？

琦：其實我哋上年開始有分歧，感情已經出現問題，今年2、3月正式搬離……屋企，搬開係因為諗住大家唔可以一齊，就打算分開，搬嘅時候佢屋企人都在場，都知大家咩事。

主：係咪好明確講分手？

琦：係呀！大家都好明確知道。

主：唔係一時三刻嘅決定？

琦：大家相處咁長嘅時間。（開始喊）大家都好努力付出過，好關心對方，以前同依家我思想上有唔同，成熟咗，好想搵個真真正正照顧到自己嘅人，所以有咁嘅決定。（開始崩潰狂喊，要暫停訪問）

琦：咁多年嘅嘢要Summerize（概括）嚟講真係好難……（淚如泉湧）

暗示豪仔放料

對於5月豪仔舉行生日會時，她與豪仔仍然拖手見人，完全不似已分手。思琦解釋是對方要求，她見到有大批記者在場亦感驚訝！

主：點解會出現喺豪仔嘅生日會？

琦：大家識嘅朋友都有出現，豪仔好想我去，作為朋友，雖然分開咗，都唔想喺佢咁開心嘅日子唔出現。佢打畀我，話好多朋友等緊我，叫我快啲嚟！屋企人知道咗都好反對，但我冇聽到屋企人嘅說話，都係朋友心態，冇諗到有咁多傳媒，如果知嘅話未必去。

主：佢話就嚟結婚？

琦：我當時好矛盾，冇諗過佢會咁講，我都好愕然，根本冇咁嘅打算同計劃，之後再畀人問係咪結婚或者「有喜」，我都答冇咁嘅打算，起碼都3、4年之後，就係唔想直接講我哋分開咗！

思琦表示宣布分手前已告知豪仔，並暗示對方放料令她被追訪。雖然她否認有新歡，但卻希望可盡快找對象結婚生仔！

主：點解選擇喺活動上宣布？

琦：之前嗰日我同佢電話聯絡過，話我會同傳媒講，你未必接受到，但我都會講……但係未宣布之前已經有人跟！（已經跟住你？）佢哋知得好快囉！好愕然！其實大家有共識我先宣布。

主：有指你同時有新歡，甚至識咗好耐？

琦：我心情好亂，仲未放得低大家嘅感情事，係時間留意吓身邊嘅朋友，一直關心我嘅人都好多，好想搵個啱自己、照顧到自己嘅合適對象。

主：有人寫你懷孕？

琦：（面有難色）可能我成日同人講我鍾意小朋友，自己年紀唔細，33歲，開始見到屋企人年長，60歲喇！想快啲搵個啱嘅人，快啲有自己嘅屋企、自己嘅小朋友，等佢哋可以抱孫。

主：懷孕嘅事係冇嘅？

琦：（點頭）係……（你都想快啲？）希望快啲啦！