Fundman睇市：保利協鑫反彈未完

特區政府推iBond（通脹掛鈎債券），發行額上限100億元，入場費1萬元，預期最多係1人1手格局！三年到期的iBond，息率以當年通脹高低付息，假如發行後一年通脹平均有5%，買1手一年收息500大元，喺今日百物騰貴底下，可能只夠一家大細出去飲餐茶，iBond係咪真係可以幫市民對抗通脹？大家心裏有數。特別提醒看官們，萬一係透過銀行投資戶口揸貨，最好先問清楚會唔會每年收存倉費用，否則所收利息可能仲要水瓜打狗，唔見一截。

周一美股無市，前日急升372點的港股，無咗再向上炒的動力，在牛皮悶局中作結，恒指全日波幅得114點，收報22,747點，跌22點，成交縮減至611億元。間尺派認為，技術裂口必須回補，如果今次恒指先回補星期一留低的22,464至22,728點上升裂口，後市會更加健康。

中資股或已見底

近期同幾位基金界朋友茶敍，意外地，大家都睇得比筆者樂觀，有老友更提醒筆者，查實六月底七月初港股表現唔差，尤其剔除內銀、內險、中移（00941）等股份，唔少中資股如部分內房、內需及新資源股低位升幅唔少，可見基金並無因為人行緊縮政策持續而逃避市場系統風險，反而專攻高啤打值股份。或者內地A股及國企股，中線低位已經見咗都未定。

今年是中國「十二五」規劃開局年，國家明確支持可再生能源的開發及應用，之後的福島核事故，核電安全受到質疑，內地未來在核電方面的發展，或多或少會受到影響，佔全國發電量不到1%的太陽能會否乘勢抬頭？筆者不敢亂估，但預期隨着多晶硅價格持續下滑，未來十年發電成本效益將進一步貼近其他可再生能源，而產業發展亦將逐漸由政府補貼企業應用主導，逐漸達到具成本效益的平衡點。

保利協鑫（03800）是多晶硅行業龍頭，也是全球最大的多晶硅及硅片生產商，多晶硅是建設太陽能收集設施的必要部分。

保利協鑫股價由五月份高位5.72元大幅回落，除基金洗倉外，相信第二季多晶硅價格大幅下挫，才是令股價由強轉弱的催化劑。歐洲多國今年實施財政緊縮，削減不少對新能源項目的補貼，加上經過兩年的高固定投資期，全球多晶硅供應量大增，價格單在第二季跌幅超過三成，毛利受壓的預期，對保利協鑫股價構成一定壓力。

多晶硅價格喘定

然而，今年產能較去年大增1.6倍，至4.6萬公噸，即使考慮毛利率較過去兩年回落，但睇番分析員最近四星期內，把保利協鑫一一及一二年盈利預測平均調低4.4%及6.8%，但綜合預期一一年純利仍然錄得77%的增長，至62.1億元人民幣，預期市盈率僅9.2倍，較歷史平均估值11.6倍，低出超過兩成，可見毛利受壓的問題已從估值折讓中反映。

踏入六月中，多晶硅價格跌勢有喘定迹象，公司主席朱共山及執行董事孫瑋，亦曾分別在3.38及3.45元增持，或者股價短期要重返5.72元的雙頂阻力唔易，但只要估值回到比較合理的十一倍水平，股價已可見5.2元，看官不妨以此作短期目標。