Fundman睇市：粵投低風險高息股

經過上星期連彈四日，加埋周一英美股市假期休市，預咗尋日市況會靜，港股在期指結算日升66點，報23,184點，大市成交508億元，是半日市以外今年最低紀錄，魚缸內博反彈的有多大信心，可見一二！

靜市中，連大戶對轉倉都唔算積極，六月期指成交唔夠55,000張，唯一比較有趣的是，六月期指收23,102點，較恒指除息後的理論合理價23,015點，高水87點，咁嘅幅度近期都算少見，民間智慧話大高水反映期指炒家睇好後市。個人認為短期低位見咗，可是仲要內地通脹見頂的消息配合。

A股走勢令人失望，昨日滬綜指中段曾經升至2,728點，收市倒跌3點，報2,706點，終於要連跌八日，睇番人民幣隔夜拆息再回落0.28厘，返到2.55厘，只係上星期5厘高位的一半，但A股仲係一池死水。

內地水緊A股難彈

同個A股基金經理傾開，話依家時勢造英雄，內地地下錢莊見人行抽銀根，佢哋商機處處，開始同企業甚至散戶合作，畀40至60厘佢哋吸納存款，再以80至100厘年息將錢拆出去畀中小企業賺息差，股民同有水的公司，見到做大耳窿搵錢容易過炒股，索性棄股套現賺高息。佢認為如果水緊情況持續嘅話，A股短期要出現V形反彈，唔係想像中咁容易。

最近港股風高浪急，筆者搵咗唔少港股基金季報表，睇來睇去，真係無幾多間港股基金表現特別標青，同股市窄幅波動近三季有關，跑贏指數（大多是MSCI中國指數）3%以上已經算好叻，悶局持續的話，倒不如睇番一啲「雙高股」，即高現金流、高派息的股份，回報隨時唔差得過幫襯基金公司。

尋日大摩推介和電香港（00215），預計現金流改善之外，未來派息比率也會增加，吸引到唔少好息之徒跟進，股價勁升0.21元，報2.5元，一洗業績後級級落的頹風。筆者今年兩隻心水REITs，領匯（00823）創新高後回落0.2元，報26.05元；匯賢（87001）升0.15元人民幣，報4.96元人民幣。

估值吸引逢低收集

粵海投資（00270）其實都屬於高現金流、高防守性及高息的股份一類，業務性質簡單，六至七成現金流來自賣東江水，單是供港水費一年已收30億元，加埋路橋經營等基建及電廠，這批穩定項目，佔總現金流收入八成以上。儘管每年供水量不容易有大幅提升，每年只係1至2%，但中國水價是亞洲區數一數二最低，中央也不止一次指出水費對民眾收入比例太低，未來水價仍有相當調升空間，這將是粵投未來收入的重要增長。

大行估計粵投今、明兩年純利25.3億及26.9億元，現價3.96元，市盈率9.7倍及9.1倍。以每股預期股息15.1仙及16.4仙計，股息回報率相當於3.8厘及4.1厘。

或者對比領匯接近5厘回報，粵投表面上唔夠吸引，但如果考慮商場租金及涉及民生的食水價格兩者的穩定性，粵投無疑會係收息股組合中，1隻經濟風險較低的選擇，目前市盈率比歷史估值11.5倍低一成五，係理想收集的時間。