股海實戰：中國食品重拾增長動力

再有藍籌股配股集資，唔多唔少影響市場氣氛，加上外圍股市偏軟，恒指昨日一度跌至24,687點，收市報24,710點，跌253點，大市成交1,167億元。

雖然前日美元反彈，但金價卻突破每安士1,400美元，真係唔知搞邊科！若然家有喜慶事未有預早買定金飾，眼見金價日日創新高，真係幾頭痕！金飾股炒風幾近瘋狂，六福集團（00590）曾高見25.2元，收報24.45元，升5.3%，月初以來累計升幅超過三成，炒佢仲好過炒金！金礦股亦水漲船高，首選股份招金礦業（01818），股價以歷史新高29.2元收市，單日升幅5.4%，強到爆炸！

油價升、金價升，樓市股市升勢亦浪接浪，圍繞衣、食、住、行嘅成本亦會跟住升，總之大家要有心理準備，迎接百物騰貴嘅日子重臨。講到食，原材料價格上升，食品有提價壓力，上月便傳來康師傅（00322）方便麵加價一成，其他柴、米、油、鹽都會跟住加。

講開呢個問題，內地將於明日公布十月份CPI及PPI，預期通脹壓力進一步上升，CPI或會突破4%。事實上，人行上月突然加息，已被視為標誌着通脹重臨，至於年底前人行會否再次加息，可能性還不能完全排除。

對於中小型企業而言，原料成本未必能完全轉嫁消費者，但對於大型企業而言，議價能力較高，可透過擴產以實現規模效益，以及提升產品售價，將原材料價格的漲幅轉嫁客戶，以維持毛利率。所以，雖然喺通脹環境下，理論上凡內需股都可受惠，但阿莊認為，選股宜採取大捨小嘅策略。

優化酒業經銷結構

聚焦大型食品股，又令阿莊想起中國食品（00506）。公司主要從事酒類、飲料、廚房食品及休閒食品，而阿莊最關注嘅係其酒類業務。目前，中食於內地從事產銷「長城」及「Greatwall」葡萄酒產品，乃全國知名葡萄酒品牌，今年上半年公司酒類業務銷售收入14.56億元，同比減少7%，主要係管理層積極精簡經銷結構，加強品牌管理和明確中高端主打品牌，相信經過今年嘅重整後，其酒品業務嘅競爭能力將得到提升。

最近一個季度，內地酒股股價飛升，銀基（00886）股價自十月初至今累升逾七成，而掛牌將近一年嘅通天酒業（00389），亦趁市旺配股集資逾5億元，可見投資者睇好內地酒業市場前景。中食既以葡萄酒為主要產品，單係呢項業務毛利率便超過50%，待今年整合完成後，盈利能力將得到提升，並帶動集團回復增長動力，但現價並未反映潛力。

再看中食嘅股價走勢，九月下旬重上250日線，十月初高見6.8元後又再進行調整，惟現時50日線及250日線匯集於6至6.1元水平現支持，可趁機收集，目標試衝7元關，跌穿5.75元止蝕。

戰報

華晨汽車（01114）

姚午齊上周四指華晨有機會再試高位，昨日逆市做好並高見8.15元，較推介當日低位7.21元，累升13%。

+13%

合景泰富（01813）

May上周五指合景泰富重拾升軌，昨日隨內房股做好，一度升上7.25元，較推介當日低位6.55元，累升逾一成。

+10%