呂慧儀孭層「樓」陪陳豪祥仔拉客

視后大熱佘詩曼及鄧萃雯缺席昨晚《2011無綫節目巡禮》，冧客重任落在性感花旦與小生身上，戴上43卡鑽飾的呂慧儀與高海寧谷爆事業線，笑言如戴成層樓出街！

無綫一年一度的節目巡禮昨晚舉行，藝員傾巢而出與廣告客戶近距離接觸拉客，不過大部分一線花旦冇影，兩位視后大熱門佘詩曼及鄧萃雯都未有現身，令一眾型男小生及二、三線性感花旦要更加落力拉客！陳豪與大露背的廖碧兒以情侶檔翹手進場，其後他與陳法拉傍實站在頭排中間位置的汪明荃，盡顯一線小生地位！芸芸小生中，陳豪最受歡迎，爭相與他合照的客戶大排長龍，問到穿密實西裝的陳豪被熱情客戶圍攻，他笑容尷尬地說：「我占士邦毛好勁。」而廖碧兒則戴上140萬元首飾，被指不夠其他花旦性感時，她即自爆未必出席台慶：「乜咁需要我咩？」

「非凡哥」冧掂梁乃鵬

至於視帝大熱黎耀祥勁受客戶歡迎，而人氣急升的麥長青以「非凡哥」造型現身，博得客戶喜愛之外，連電視廣播有限公司副行政主席梁乃鵬都主動上前邀他合照，麥長青笑說：「啲客戶冇乜Taste，話我靚仔，好尷尬！（梁乃鵬都搵你合照？）梁生叫我唔好做咁多衰人，話我做得好，我話係角色好啫！」吳卓羲不只落力拉客，還賣口乖冧公司，問到明年參與三套劇集的他是否被力捧？他說：「係當然好啦！我係TVB嫡系，係TVB教育我。（流TVB血？）梗係！我流TVB嘅汗，食TVB嘅飯。」

性感花旦呂慧儀、高海寧、胡定欣、周家蔚、陳美詩及苟芸慧等大騷「事業線」，高海寧露前又露後，甚有睇頭，不過陳美詩亦醒目地俯身鞠躬，呂慧儀還靠閃爆鑽飾搶鏡，戴上逾百萬元的43卡鑽飾，她表示是為了賀43周年台慶，雖然她的低胸及閃鑽十分搶鏡，但卻邊行邊托胸，頗為失禮，她解釋：「瘦咗！而且戴住成層樓出街，好重。（冇咁性感係收斂？）唔係！台慶會畀驚喜。（怕投訴？）唔係！我係TVB小人物啫！（台慶服裝開前定開後？）唔係開前開後，開心咪得。」