Fundman睇市：思捷 終須有日龍穿鳳

人行對人民幣升值立場有軟化迹象，A股立即有反應，升2.5%去到五個月高位，對港股的刺激不言而喻，恒指昨升263點，收報23,207點，成功衝破海嘯後最高點23,099點，標誌着股市進入海嘯後第二波升浪。

今日焦點，係九龍塘義德道地皮拍賣，較早前，旁邊一幅地皮以呎價1.6萬元天價被投得，順理成章，市場對今日再誕生高價「地皇」，充滿期望，回顧恒生地產分類指數，尋日升幅1%，稍稍不及恒指，可是九月初至今計，累積升19%，又跑贏同期恒指12%升幅。

從市場估價去睇，筆者有少少憂心，事關毗鄰一幅地已被投得，若非計劃合作，否則其他發展商競投興趣有幾大，仲係未知之數，筆者雖然睇好地產股，但短期升幅唔細。相反，既享受到資產泡沫，兼可以在零息期收到4至4.4厘股息的領匯（00823），睇落更覺吸引。領匯九月至今升得8.6%，跑輸地產股一截，如賣地成績不及預期令地產股回落，領匯值得捧場。

市場對壞消息免疫

近期市場聽到好消息高興，壞消息亦問題唔大。上星期，美國公布九月就業數據唔好，炒家以憧憬加速二輪量化寬鬆出台為理由，華爾街三大指數全部照升如儀；來到亞洲，情況一樣，尋日A股收市，傳人行可能調高四大銀行存款準備金率0.5%，史提芬以為港股有機會先來個調整，點知聽到班分析員同基金老友的意見，不知幾咁樂觀，當成天大利好消息，認為萬一人行落實十月中下旬加存款準備金率，將意味着年底前加息機會極微，亦因為咁，尋日港股午市受消息影響唔夠三十分鐘，又還原基本步去番高位收市，市況牛起上嚟，真係無得傾！

個市升成咁，又要講番今年最遺憾嘅推介，非數歐洲時裝品牌思捷（00330）莫屬，最初留意佢時，無估計到「歐豬」危機牽連咁大，部分歐豬國消費市道元氣大傷，思捷股價由年初計亦累積跌咗14%，遠落後於大市。更甚者，市場似乎已淡到漠視一切利好訊號，例如短短個多月，歐元兌美元升值接近一成，對這家八成七銷售收入在歐元區產生的公司，業績大有好處，上星期高盛就出過份報告，指出歐元每升值1%，大約可增加思捷純利1%之多。

最近，思捷請咗其中一個競爭對手，H&M前品牌總監及創作總監等幾個管理層，重整歐洲的設計及銷售部分，當然，市場照例都係全無反應，睇番過去四星期，綜合大行將思捷一一年及一二年盈利預測，分別調低1.67億元及2.32億元，調整幅度大約等於4%及4.8%。

利好因素尚未反映

股神話過，人人貪婪時要學會審慎，人人審慎時你要學識貪婪，今日似乎後面嗰句比較啱用。睇番市場悲觀預測，思捷一一年賺41.2億元，相當於13.6倍市盈率，同業H&M，一○年及一一年預期市盈率分別係20.4倍及19.1倍，計落思捷「至少」折讓兩成八。

再者，去年向華創（00291）買番內地經營「Esprit」及「RedEarth」的合營公司TSI餘下51%股權，思捷內地零售業務發展的可能性，絲毫無反映在股價之上，環顧種種因素，如果今次推介是錯，筆者亦願意陪其他思捷捧場客一齊錯落去。