潘兆平擺烏龍，連勞聯改選日子都搞錯。
港九勞工社團聯會（勞聯）上周六改選領導層，吳慧儀繼續冧莊做主席，立法會勞工界議員「潘少」潘兆平退任副主席，改任勞聯四名常務委員之一，不過唔知係咪立法會工作忙到暈陀陀，潘少竟然擺烏龍，一來以為下個月先至改選領導層，尋日仲打算「拉票」叫人唔好選佢做勞聯主席或副主席，認真失威。
政黨政團領導層改選，候選人努力拉票係人之常情，但潘少疑反其道而行，對於出任主席或副主席心如止水，理由係想專注立法會工作，雖則潘少連勞聯改選日子都記錯，不過改選結果一如所願，由副主席「降呢」至常務委員。
轉眼間，潘少已出任勞工界議員兩年半，知名度未見顯著提高，但佢笑言呢段時間有三大得益，第一係肚腩肥咗一吋，第二係重咗五磅，第三就係血壓高咗，估計可能同坐得多同少做運動有關。
第一手消息請下載on.cc東網
