林健鋒話多啲人做社區工作服務街坊，何樂而不為。
踏入新一個選舉周期，首場大戰就係今年底嘅區議會選舉，日前有傳建制大黨不滿商界議員林健鋒所屬嘅工商政團經民聯，破壞建制派協調機制四處派人空降參選，撞啱我哋尋日於中環撞到林健鋒即刻問個究竟，佢自言從市民角度出發，多啲人做社區工作何樂而不為，唔明點解某啲人要呷醋喎。
經民聯喺二○一二年十月成立，副主席林健鋒話佢哋喺兩年前已派人到新界東做地區工作，如果有人唔滿意佢都無辦法，事關地區工作從來唔係「零和遊戲」，唔係話某政黨做嘢，其他人就唔畀做。佢仲話如有人擔心其他人比自己做得好，咁就要檢討吓，唔係喺度妒忌其他人。
林健鋒又話相對於大型政黨，佢哋的而且確無乜地區樁腳，但佢哋唔少社區主任都係律師或專業人士，唔係一味搞旅行或送嘢畀長者，相信畀多個選擇畀街坊，絕對有利無害。講到底，區選都係講勝算，建制陣營於撞區嘅區份嘅最新形勢，料未來數個月將會明朗化。
第一手消息請下載on.cc東網
