馮載祥（右）陪太太馬潔嫻（左）同兒子馮興禮入馬場玩。
新年期間，深水埗「桂林夜市」同多區冒起小食檔，關注香港係咪需要街邊夜市。尋日沙田馬場名人多多，大家嘅話題之一係小販的回憶，仁愛堂副主席史顏景蓮（Kimmy）同丈夫史立德都鍾意食街邊嘢，仲話難忘年輕時拍拖食臭豆腐同燒賣嘅滋味喎！史立德話，年輕時成日都會同太太去食豬雜、咖喱魚蛋同燒賣等街頭小食，仲遇過「走鬼」嘅驚險情況，因為啲小販車盛載滾油，混亂中佢拔足奔跑避開，笑稱要跑到好似捉賊咁快。
史立德（左）及太太史顏景蓮鍾意食街邊小販。
立法會前秘書長馮載祥、太太馬潔嫻同兒子馮興禮都有入場，鍾意食街邊臭豆腐嘅馮興禮話，可以同食榴槤嘅太太「鬥臭」喎！雖然街邊小販係唔少人嘅童年回憶，不過喺香港已買少見少。
陳正欣倡檢討政策
保良局總理陳正欣就話，香港舊有規管小販嘅政策已過時，應該要檢討吓，例如逢新年等假日係咪可以彈性開放，雖然咁做可能對一般食肆造成影響，但係有得必有失。
第一手消息請下載on.cc東網
