張華峰（左）與盧偉國齊粉墨登場向街坊拜年。
立法會金融服務界議員張華峰同工程界議員盧偉國（WK）尋日分別化身成財神同福祿壽三星中的祿星，去美孚同大埔向居民派入咗朱古力金幣嘅利是。雖然財神衫已經比一般衫鬆身，不過對於體重有成二百磅嘅張華峰嚟講，件衫仲係太細，搞到佢淨係扣到背脊最上面嘅一粒鈕，仲畀WK笑佢學人着Deep V做脹爆財神。
脹爆嘅張華峰背後似着Deep V。
張華峰尋日一去到美孚，就匿埋喺架車度換衫換咗足足十五分鐘。點解要換咁耐？原來佢個肚腩「頂」住件財神衫，搞到後面啲鈕扣極都扣唔埋，要就咁半披半着出嚟見人。WK乘機取笑張華峰學人着Deep V，不過就係倒轉嘅Deep V喎。
張華峰就大爆，梁美芬原本應承會扮「何仙姑」，不過尋日竟然臨時「甩底」唔見人。原來梁美芬早幾日去北京旅行，但前晚北京落大雪，結果搭唔切飛機返香港。
第一手消息請下載on.cc東網
