曾任港鐵主席的蘇澤光，即將調任機場管理局主席，他開心有機會「飛天遁地」。
將於今年六月調任機場管理局主席嘅香港貿易發展局主席蘇澤光（Jack So），尋晚「真正」舉行任內最後一次傳媒春茗，佢睇起嚟心情輕鬆愉快，笑稱自己係「無糧」主席，即係無糧出嘅主席咁解，五月底卸任後，瞓一覺就要到機管局返工，仲話好期待呢個飛天的機會喎。
曾經出任港鐵主席嘅Jack So話，自己好夠運有機會「飛天遁地」，事關佢喺地鐵任內，有機會巡視路軌裂痕或漏水等情況，好似「遁地」咁。當到機管局返工之後，就如「飛天」。不過，佢唔識駕駛飛機，以前只係駕駛過模擬飛機。講起貿發局嘅工作，Jack So話做咗八年主席，加上之前做咗貿發局總裁七年多，一路睇住貿發局成長，亦都見證香港由製造業轉變為金融中心。
Jack So唯一遺憾係貿發局爭取擴建灣仔會展多年，直到早前政府才有好消息傳出，將興建二十萬呎會議中心，但仍未能滿足香港對會展場地嘅需求，勸勉貿發局同事仍需努力喎。
第一手消息請下載on.cc東網
