政壇：搞搞政：「盛事」臭名傳千里 李美辰搞波逼改名
要搞起一個活動，除天時地利，仲要人和同好名字，和富大埔足球隊會長李宗德女兒李美辰等負責舉辦個足球嘅盃賽，仲搞咗個名為「體育盛事協會」嘅組織，不過，一、兩個月前，呢個協會靜靜雞改名，變化包括搣走「盛事」兩個字，點解呢？唔通驚咗盛事基金呢輪嘅臭名，所以捨盛事而辦實事？
設計圖片及對白
恐未開波惹風波
呢個原本叫「香港體育盛事協會」嘅組織，係李美辰同專業人士協會主席陳建強等近十人喺去年底成立，計劃舉辦足球盃賽為慈善團體籌款，不過，正式舉辦時間一改再改，據聞，最新時間表已有，計劃九至十月舉行，但翻查吓公司註冊處資料，「體育盛事協會」早一、兩個月前正式改咗名做「活力都會協會」。有知情人士私底下透露，盛事基金搞到「盛事」兩個字成為負資產，相信短期內好難復原，為免佢哋嘅足球盃賽未開波就惹風波，所以果斷改名。
盛事基金嘅審計同聆訊雖然暫時告一段落，但個基金引發嘅連串醜事就仲有排畀人鬧，依家搞到連團體個名都唔敢叫盛事，當局係咪應該重新研究吓摺埋盛事基金嘅建議呢？
