政壇：東北抗爭擺慰勞宴
講起今年立法會難忘事，五月糾纏到六月尾嘅財委會審議新界東北前期撥款必算其一，咁啱得咁蹺，今日係撥款獲通過「滿月」嘅日子。立法會被衝擊、搗毀至滿目瘡痍嘅手尾仲未搞掂，另一邊廂，卻見立法會議員慢必陳志全喺社交網站上載大擦盆菜嘅相片，話係「新界東北抗爭慰勞盆菜」喎！團體擺咗十幾圍盆菜宴，慰勞有份抗爭嘅人士喎。話時話，要擺足十幾圍，呢個慰勞宴嘅花費都唔係小數目，最少「貧農」一定做唔到囉。
審議撥款案時，立法會遭到近年最激烈嘅暴力衝擊。（資料圖片）
慰勞宴筵開十幾席，卓佳佳、慢必（左二及三）相見歡。（互聯網圖片）
（互聯網圖片）
到場擦一餐嘅除咗慢必外，仲有幫手「拉布」嘅張超雄，同唔肯頂替吳亮星做財委會主席嘅劉慧卿，據知大部分泛民議員都有獲邀開餐，可惜唔係個個都肯賞面山長水遠入古洞開餐。政界中人外，粉嶺北農村及居民聯席成員卓佳佳、古洞北發展關注組主席李肇華（華哥）同人稱「財哥」嘅打鼓嶺坪輋保衞家園聯盟成員張貴財都係座上客。
有份食盆菜嘅慢必解釋，呢餐盆菜稱唔上係慶功宴，相信係主人家有感抗爭終於告一段落，決定假古洞一間茶樓擺足十幾圍，慰勞有份為抗爭出一分力、甚至落場衝擊嘅立法會議員、社運界朋友同市民。眾人揚言下一道「戰線」將會係去城規會，反對成個發展項目咁話。
民生議題被犧牲
呢餐飯會唔會有團結「軍心」嘅作用就未知，但新界東北發展一事喺社會上有好多意見，尤其今次搞到立法會遭到近年最嚴重嘅暴力衝擊，再加上包括慢必在內嘅多名泛民主派議員發動「拉布」足足七星期，最終前期撥款一樣通過，臨尾仲連累財務委員會擠塞好多民生項目未傾，「文爭武鬥」一輪，香港全面撕裂，慰勞？慶功？真係令人無語。
