政壇：林凱章踢波樂極生悲拗柴
香港菁英會一班年輕人尋日趁周末齊集土瓜灣一間另類「國際學校」，為該會主辦嘅家庭夥伴計劃助陣，包括主席梁宏正、常務副主席盧金榮（Wingco）等人都有捧場，見立法會議員林健鋒個仔林凱章（Victor）着住人字拖到場，左腳仲用繃帶紮實晒，原來係早前踢波時唔小心拗柴。Victor諗起都依然心有餘悸，仲話以後都唔敢踢足球喎！
林凱章踢波整傷左腳，仍未痊愈都出席活動打氣。
盧金榮（中）及一對女兒亦參加配對計劃，右為黃志揚，左為梁宏正。
從小就熱愛足球嘅Victor話，大約三個禮拜前，當時世界盃賽正熱，佢一時技癢，約咗班波友落場玩。期間佢狀態甚勇，入咗一球，欣喜若狂、高聲歡呼，結果樂極生悲，唔小心扭傷隻腳。立即睇醫生診斷係韌帶撕裂，足足有三周與拐杖為伍，近日先至可以自己行番，但仲有一段時間要做物理治療，可能要六至八星期先好，認真慘痛。
今年剛剛榮升父親的梁宏正就話，希望藉着活動展示菁英會關顧弱勢社群的一面。今次活動選擇喺保良局陳維周夫人紀念學校舉行，皆因該校專門為新來港小朋友開辦適應課程，經過半年後的適應期即可進入主流小學讀書。
