政壇：政商定格：曾浩輝關心抗疫舊同事

衞生防護中心前總監曾浩輝自舊年底以私人理由辭職後，好少喺公開場合出現。日前喺仁濟醫院活動上見到佢，佢除咗一頭黑髮變咗灰白色之外，精神睇嚟唔錯。

以前逢親有流感或傳染病，就會見到曾浩輝第一時間出嚟交代進展，最近H7N9禽流感疫情快速擴散，市民或者會諗起喺一群防疫醫生之中，就係唔見咗佢。佢笑稱，唔知算唔算好彩，佢離開官場後先爆發咗新沙士同H7N9疫情，佢唔使再頻撲抗疫，但佢好關心舊同事，唔知佢哋忙成點。

有冇諗過自己開診所或復出加入其他機構？佢話退下火線後到處旅遊同埋陪屋企人，好享受咁鬆弛嘅生活，依家仲未抖夠，暫未諗住將來做乜嘢喎！