政壇：搞搞政：長毛未開戰自剪30修訂

立法會預算案拉布戰明日展開，拉布四子提出逾七百六十二項修訂，當中最多嘅係社民連主席「長毛」梁國雄，佢一口氣提三百幾項修訂。

政府睇過七百幾項修訂後，曾向立會主席曾鈺成提出意見，話長毛部分修訂唔合規矩，立會將呢個意見轉達畀長毛，長毛話願意修改字眼，但曾鈺成就認為長毛肯改都於事無補，因已過咗提交修訂期限，所以唔會批准佢修改。就係咁，長毛就眼白白望住自己提嗰三十項刪減部門首長薪酬嘅修訂壽終正寢，變相幫曾鈺成剪自己布。拉布戰未開始，長毛已先輸一小仗，似乎佢今次唔係好認真喎！

對於政府話大部分修訂都係無聊瑣碎，目的只係拉布，唔應該納入議程，但曾鈺成唔接納，於是批准咗七百一十項修訂，咁即係變相摑咗財爺鬍鬚曾一巴。

咁要拉布拉幾耐呢？曾鈺成話部分修正案相似，已合併成二百幾項辯論，但未計辯論時間，單係表決時間估計最少要二十個鐘。佢又話現階段無議員支持通宵開會，暫時決定朝九晚十，唔會喺周六、日開會，亦會讓路畀周五嘅內會、財委開會。