政壇：政商定格：林燕勝周身刀兼三職

喺企業銀行做賓架嘅經常要周身刀，先可見微知著，了解客戶嘅財政狀況。恒生銀行企業及商業銀行業務總監Donald林燕勝就話，自己經常要做齊網絡工程師、醫生同偵探。

Donald每年都會帶班管理培訓生去實地睇廠，學做偵探。佢話如果見到個倉入面擺咗好多紙箱，就會諗究竟係即將出貨定係擺好耐嘅存貨呢？於是佢就提醒同事，記得摸紙箱頂，如果鋪晒塵，抹到手都污糟埋，就估到擺咗好耐啦。除咗睇廠，佢最記得就係金融海嘯時，成日與同事一齊睇財務報表，幫企業「斷症」，連同事都幫佢起花名，叫佢做「醫生」。

星期一至五已忙到七彩，佢星期六都有例行節目，就係陪客戶打高爾夫嘅「打波日」，佢形容自己就係建立人際關係網嘅網絡工程師，但係星期日就點都要留番嚟陪太太，而兩個讀緊書嘅囝囝就係佢嘅「好兄弟」，因為大家關係似老友多過父子喎！