零團費借屍還魂 懶監管旅業遭殃

內地遊客來香港玩，夜晚最熱門嘅餘興節目係乜呢？上扯旗山？去女人街？唔係。答案係：上時鐘酒店。

嗱嗱嗱，大家唔好心邪，太一叮講緊嘅係本港近期發生嘅多宗旅遊業醜聞。內地遊客因為購物金額未達標，被安排入住時鐘酒店，唔止唔happy，仲谷到一肚氣，鑊鑊搞到報警處理，不歡而散。

嗱，又有旅行團出事！一個貴州家庭十一名成員喺深圳參加三日兩夜港澳遊，被帶到商店購物，懷疑因為消費額唔夠數，夜晚被安排入住九龍城時鐘酒店。眾人不滿貨不對辦，一度佔據旅遊巴唔願落車，驚動警員到場調停。結果佢哋唔使入住時鐘酒店，不過就要下榻「旅巴酒店」，喺車廂度過難忘嘅香港一夜。第二日，旅行社息事寧人，向呢個怒火街頭嘅貴州家庭賠償，事件至無再次演變成臭名遠播嘅劏客醜聞。

唉，睇到呢度，大家不禁要問，香港旅遊業究竟出咗乜嘢事，點解劏客醜聞總係不絕於耳？旅遊業係香港嘅其中一碌經濟支柱，唔通有人真係要搞冧佢至安樂？

咁啦，想知旅遊業出咗乜嘢問題，睇下今次單嘢就一清二楚嘞。呢個旅行團嘅團費少到離譜，由二百二十蚊至五百蚊不等，居然可以暢遊港澳三日兩夜，咁嘅費用連買張迪士尼門券同澳門船飛都唔夠啦！顯而易見，呢種根本就係變相「零團費」，咁搞法，遊客消費額唔夠而被迫入住時鐘酒店嘅特色安排，有乜可能唔成為內地旅行團嘅晚間必備節目吖，叮！

其實，零團費借屍還魂已經唔係最近嘅事，只係港府一直喺度遊魂，對問題闊佬懶理，不聞不問，更加唔好話出招打擊。係人都知，只要零團費存在，劏客導遊就唔會消失。一個惡導遊阿珍倒下，千千萬萬個阿珍站起來，港府唔係宣布成立旅監局就可以大安旨意，旅遊業隨時遭殃o架！

更何況，旅監局成立仲有排等，如果港府呢段時間翹埋雙手唔做嘢，搞到內地同胞逼爆時鐘酒店嘅荒謬場面蜚聲國際，咁旅監局將來都唔使開工咯，事關到時旅遊業碌柱恐怕都已經被摧毀晒。

話時話吖，一隻手掌拍唔響，零團費禁之不絕，內地都有責任。內地同胞固然要吸取教訓，防止被騙，內地當局亦應該做多啲宣傳教育，如果唔係，餐餐任由內地同胞來港之後被滿「宰」而歸，你哋都好無面啫，下話？叮！