低B奶粉無王管 低智官僚誤蒼生

面係人哋畀，架係自己丟。低B奶粉愈揭愈多，食得放心變咗食難安心，嬰兒父母手足無措，人心惶惶，港府監管失職累人累物，淪為國際笑柄。

嗱，再有四款日本奶粉驗出碘含量較低，計埋早前發現嘅兩款，問題奶粉最少有六款，問你怕未。食物安全中心風險評估發現，呢啲產品碘含量比世界衞生組織建議每日攝入量少三分之一，有可能影響甲狀腺功能，甚至影響嬰兒腦部發育，為人父母嘅唔擔心就假。

關注團體直斥港府把關不嚴，導致嬰兒奶粉銷售無王管，奶粉商趁機亂嚟，要求將營養標籤法例嘅規管範圍擴大至三十六個月以下嬰兒食品。

話時話，低B奶粉之所以搞到全城風聲鶴唳，家長飽受困擾，衞生署查詢電話呢幾日更畀人打到爆，港府監管不力，法例漏洞百出，可以話係始作俑者。

唔講唔知道，原來本港從來冇抽驗過嬰兒奶粉嘅碘含量，今次問題曝光係啱啱遇着剛剛，完全靠撞彩嘅咋。如果唔係食安中心因為專題研究，特例抽驗嬰兒奶粉中三十幾種營養成分，睇怕真相永遠冇人發現，都唔知幾多嬰兒會繼續受害，叮！

食安檢驗零把關，法例同樣甩甩漏漏。本港話就話已立法監管食物營養標籤，弊在三歲以下嬰幼兒食物可以豁免，即係話奶粉商可以隨心所欲，作得就作。其實，審計署舊年已經對營養標籤法例唔包括嬰兒食品表示關注，要求檢討，點知當局關人個關，拖得就拖，到依家仲未堵塞漏洞。

老實講吖，究竟幾多種本港銷售嘅奶粉有問題，根本冇人知，今次六款被驗出碘含量過低，可能只係冰山一角嘅咋。食安中心仲大派定心丸，話舊年日本大地震後，日本奶粉銷量急降，估計受今次事件影響嘅人數唔多，只有千幾人喎。其實，港府多年來對嬰兒食品安全冇監冇管，放任自流，究竟幾多嬰兒受到問題奶粉影響，根本冇準確數字，當局純粹靠估，完全係自欺欺人。再講，就算真係千幾人受影響，都係大件事喇。

食物安全關乎人命，監管宜緊不宜鬆，何況小朋友係香港嘅未來，問題食品隨時影響一生，點可以咁求其。當局對嬰幼兒食品闊佬懶理，唔止不負責任，直頭係搵小朋友嘅生命安全同香港未來較飛，叮！