政棍厚顏無恥 選民齊掃垃圾

立法會烏煙瘴氣，保皇黨、護淫黨、拉布黨、懶蟲黨……物以類聚，蛇鼠一窩，唔怪得被形容為垃圾會。係呢，要擺脫呢個污名，唔知要等到幾時呢？

嗱，立法會清垃圾嘅時候終於到嘞。立法會選舉提名結束，參選人數創歷屆新高，近三百人爭奪七十個議席，戰況空前激烈。不過懶蟲議員競逐連任嘅情況就啱啱相反，人丁單薄到你唔信，議事堂「四大懶蟲」有三個放棄競逐連任，其中包括人稱「三點不露」嘅李國寶，你話垃圾會係咪有望無咁垃圾吖？

講起都幾諷刺，懶蟲議員咁多年來尸位素餐，唯一貢獻就係終於肯自我了斷，畀議會一個翻身機會。太一叮寄語日後新入局嘅議員，千祈唔好練精學懶呀。三點不露固然係議會史上嘅垃圾，四年不質詢、開會當遊魂嘅懶蟲行為，一樣要統統掟落垃圾桶，一件不留。一句到尾，立法會能唔能夠省招牌，可唔可以擺脫垃圾會之名，就睇選民嘅抉擇嘞！

立法會提名結束，亦即係議席爭奪戰嘅開始。懶蟲黨率先瓦解，但係保皇黨、護淫黨、拉布黨依然張牙舞爪，如果大家唔擦亮眼睛，認清呢班牛鬼蛇神嘅真面目，隨時又會將另一批垃圾送番入立法會架咋。嗱，就等太一叮同大家重溫一次啦，保皇黨就係嗰班是非不分黑白顛倒，多次出手阻撓立法會徹查「香港第一貪官」曾蔭權貪腐醜聞嘅建制派政客，護淫黨就係嗰班對壹淫媒宣淫販賤荼毒社會，居然裝襲扮啞曲線包庇嘅泛民政棍。叮你個鎯鎯，佢哋一個保貪，一個護淫，雖然政治立場南轅北轍，但有一個共通點，就係一樣咁厚顏無恥！

至於拉布黨咯喎，一樣唔係好東西，終日吵吵鬧鬧，無事生非，唔係掟蕉，就係爆粗，搞到尊貴嘅議事殿堂淪為令人望而生厭嘅垃圾崗。嗱，過去四年，正正因為保皇黨、護淫黨、拉布黨不務正業，搞到立法會嘅民望指數仲低過懶蟲議員嘅會議出席率。

所以話啫，懶蟲黨瓦解唔代表立法會從此無晒垃圾。以前捉垃圾蟲運動有句口號，「清潔香港，人人有責」，今日香港要清潔議會，一樣人人有責。各位選民，千祈要帶眼識人吖，九月九日投票日，大家一於以手中選票掃走所有垃圾，叮！