旅客員工齊受罪 港航刻薄攞嚟衰

強颱風「韋森特」橫掃香港，樹倒簷塌，威力嚇人。但講到對香港嘅破壞，就點都比唔上香港航空嘞，由於佢哋管理混亂，善後無方，搞到航班嚴重延誤，激到旅客暴跳如雷，員工更加怨氣沖天，一句到尾，港航簡直就係香港之恥。

叮！一場強颱風，港航風雨飄搖，航班亂晒大龍。旅客被集體放飛機，焗住滯留機場固然慘情，前線員工超時工作，壓力爆煲一樣咁淒涼。原來港航對員工刻薄寡恩，唔係一朝一夕嘅事，有前線員工忍無可忍，大數公司「七宗罪」，聽完之後包你對呢間企業刮目相看。

邊七宗罪呢？第一，強迫空中服務員做分外工作，喺航班升降前後「自願協助」執垃圾同洗廁所，情況已經持續超過一個月。咦……港航咁樣對待員工，唔怪得公司個朵愈來愈臭啦！

第二，未經員工同意，要求超時工作十四小時。哦，亦唔怪得咯，港航員工連日發動集體請病假，原來佢哋被長期奴役，唔「病」就有鬼咯。

第三，員工因航班延誤或取消而超時工作，一律無工錢。嗱嗱嗱，呢點反而唔出奇喎。前線員工日以繼夜連續工作三、四十小時，所以要求港航取消三日航班以疏導乘客，咁合理嘅要求居然都被拒絕。你話嘞，一間公司喺特殊情況下都只顧收客搶錢，唔理員工死活，平日又點會善待員工呢？

第四……唉，前線員工對港航嘅不滿多籮籮，太一叮都係唔再數落去嘞。如果大家有興趣知道無良航空公司點樣刻薄員工，不妨翻去內頁詳細拜讀。俗語話，疾風知勁草，一場強颱風，港航管理不善嘅醜態一鋪露晒底。

叮你個鎯鎯，強颱風襲港，港航投晒降，航班至今都未回復正常，大批旅客同員工唔知捱到幾時先至唔使再受罪。十號風球冇錯破壞力驚人，但點解其他航空公司無事，而港航就搞到裙拉褲甩，天怒人怨？原因顯而易見，港航管理一塌糊塗囉，叮！

如果話，強颱風係天災，咁呢場港航風暴對香港就係人禍，由於一間航空公司管理層不濟，隨時拆咗香港航空業塊招牌。你知啦，呢間咁不知所謂嘅公司係掛住「香港」個名堂，如果外國人以為所有香港航空公司都係咁嘅貨色，咁就大鑊咯。

一句講晒，港航內部管理已經扯起十號風球警號，港府一定要採取防風措施好好監管，唔好任由呢間攞嚟衰公司繼續令香港蒙羞，再唔係就釘佢牌，叮！