九巴唯利是圖 脫班當食生菜

巴士脫班簡直係上班一族嘅噩夢，趕頭趕命撲到車站，點知該到嗰架巴士連影都冇，返屋企遲啲都算嘞，最驚返工時間失預算遲大到，整多幾劑隨時飯碗不保。

九巴脫班當食生菜，有數據可查。呢嗱，舊年脫班率竟然高達百分之七點二，兩度被運輸署發信警告要求改善。九巴話喎，脫班問題有改善，已經降低到大約百分之三嘞，又話會重組路線減輕成本，包括喺全港多處設置轉乘車站，減少重複路線等等，講得比唱嘅仲好聽。

脫班即係交通工具冇按時間表提供服務，飛機輪船脫班通常同天氣有關，一係天上狂風雷暴，一係海上巨浪滔天。巴士喺地上行駛，唔係日日掛十號風球，居然郁吓就消失玩隱形，九巴咁搞法，等於將服務承諾當兒戲啫！

話時話嘞，脫班率所謂改善，睇怕只係數字遊戲。嗱，早排九巴就畀人踢爆，為咗短時間內做靚條數，安排疑似「鬼巴」嘅空車裝假狗，行駛總站前嘅幾個站。問題係咪真正有改善，實在要打個大問號。

再講，就算冇篤數，脫班率百分之三只不過係平均值咋，如果齋計高峰期，比例隨時遠高於呢個數，對乘客影響之大可想而知。所以話，脫班減少最多只能止吓咳，要標本兼治，只有一條路，就係全面改善同提升服務質素。

叮！係人都知九巴唯利是圖賺到盡，為咗慳皮罔顧服務質素。脫班問題其實一字咁淺，就係車長人數跟唔上服務需要，但公司闊佬懶理，增聘人手拖得就拖。服務每況愈下唔諗計改善，年年賺大錢，年年價照加，可加可減機制食得唔好嘥。

身為全港最大巴士公司，又享受專營權帶嚟嘅厚利，九巴服務理應配合城市發展需要，急市民所急。

本港人口持續增長，新市鎮不斷發展，跨區交通需求亦愈來愈迫切，加上軌道交通網絡不斷擴充，原有巴士網絡完全跟唔上市場需要。九巴早就應該與時俱進，因應乘客量變化隨時調整路線同班次，擴大同完善巴士路線覆蓋範圍。家陣至諗路線重組同設立轉乘車站，仲有冇再遲啲呀？

遲到總好過冇到，最緊要畀大家睇到服務真係有改善。講開又講，九巴舊年盈利豐厚，今年照加價，正一肥到連襪都着唔落。咪話太一叮唔提醒，明年唔好又話皮費上升，借啲意再打市民荷包主意呀，叮！